ՀՀ երկրորդ նախագահ Ռոբերտ Քոչարյանի ոչ պաշտոնական կայքի՝ 2rd.am-ի ձեռքի տակ է հայտնվել հայտարարություն, որին միացել են հասարակական, քաղաքական, մշակույթի, սպորտի մի քանի տասնյակ գործիչներ: Նրանք մտահոգություն են հայտնում առ այն, որ Հայաստանի դատաիրավական համակարգի, դատավորների և ՍԴ-ի հանդեպ «բիրտ» ճնշումներ են իրականացվում, և որ հայկական երկու պետությունների անվտանգությունը խիստ սպառնալիքի տակ է՝ «չսթափվելու» դեպքում:
ՔՊ հանրային կապերի պատասխանատու Վահագն Ալեքսանյանը «Առաջին լրատվական»-ի հետ զրույցում այդ հայտարարությունը համարեց աբսուրդ. «Ի՞նչ ասել է՝ երկու պետությունների անվտանգության սպառնալիք. այդ անվտանգության երաշխավորը Ռոբերտ Քոչարյա՞նն է, Ռոբերտ Քոչարյանն ինչո՞վ է անվտանգություն երաշխավորում՝ առյուծներ հեծնած գնում է սահմանին կռիվնե՞ր է տալիս, թե՞ ինչ է անում»:
Մեր զրուցակցի համոզմամբ՝ Արցախի և Հայաստանի անվտանգության հիմնական երաշխավորը մեր բանակն է, դրանից հետո երկրի ներսում՝ օրենքի գերակայությունը. «Եվ օրենքը պետք է վերադաս լինի բոլորի նկատմամբ, այդ թվում նաև՝ Ռոբերտ Քոչարյանի»:
Քաղաքագետ Արմեն Հովհաննիսյանը նույնպես կարծում է, որ հայտարարության մեջ ձևակերպումները հիմնավորված չեն: «Որպես քաղաքացի, որպես մարդ՝ ես կարող եմ հասկանալ, որ նրանք ինչ-ինչ մտահոգություններ ունեն. ես էլ բազմաթիվ մտահոգություններ ունեմ տարբեր ոլորտներում, բայց մեր անվտանգությունը կապել այս դատավարության հետ…»,- «Առաջին լրատվական-ի հետ զրույցում նշեց քաղաքագետը:
Նրա խոսքով՝ ոմանք այնքան են կորցրել պատասխանատվության զգացումը, որ «անվտանգություն» բառը բերանի ծամոն են դարձրել. «Իրենց այդ պահվածքը արդեն իսկապես ազգային անվտանգության խնդիր է, արդեն այն աստիճանի են հասնում, որ Ալիևին դրվատող վերնագրեր են դնում հոդվածներին: Կարո՞ղ է շուտով կամավորական ջոկատներ սկսեն կազմավորել Ադրբեջանի կողմից կռվելու համար. մի զարմացեք՝ մենք այդպիսի բաներ տեսել ենք. 11-րդ Կարմիր բանակում հայեր չկայի՞ն. կային»: