Ցանցում տեսանյութ է հայտնվել, որտեղ երևում է, թե ինչպես է փորձարկման ընթացքում ԱՄՆ Կալիֆոռնիա նահանգի ափամերձ տարածքից արձակված բալիստիկ հրթիռը մոտենում մեքսիկական ավիաընկերության ուղևորտար Airbus-ին: Հոլովակին ուշադրություն է դարձրել The Drive պարբերականը:
Կադրերը նկարահանվել են սեպտեմբերի սկզբին Գվադալահարա-Տիխուանու չվերթն իրականացնող ինքնաթիռի օդաչուի խցից: Դրանցում երևում է, թե ինչպես է հրթիռը մոտենում և անցնում օդանավի կողքով՝ մայրամուտի ֆոնին:
Ինչպես գրում է պարբերականը, տեսանյութում պատկերված է ԱՄՆ ռազմածովային ուժերի Nebraska սուզանավից Trident II բալիստիկ հրթիռի արձակումը. փորձարկումների ընթացքում, ընդհանուր առմամբ, չորս նման հրթիռ է արձակվել սուզանավից: Միևնույն ժամանակ, ինչպես նշում են The Drive-ի փորձագետները, Trident II-ի հետագիծը կադրերում սովորականից շատ ավելի մեղմ և ցածր է թվում: Նրանց կարծիքով, դա կարող է պայմանավորված լինել այն հանգամանքով, որ այս հրթիռն արդեն հագեցած է նորագույն W76-2 միջուկային մարտագլխիկով. դրա ցածր քաշը թույլ է տալիս «ուղղել» հրթիռի հետագիծը, դրանով իսկ զգալիորեն կրճատել դրա թիրախին հասնելու ժամանակը:
Նոր, մոտ հինգ կիլոտոն հզորությամբ, W76-2 մարտագլխիկի արտադրությունը սկսվել է 2019-ի հունվարին, առաջին պատրաստի նմուշը հավաքվել է փետրվարին: Նշվել է նաև, որ W76-2-ը տեղադրվելու է սուզանավերի վրա: Միևնույն ժամանակ, որպես այս տեսակի զենքի մշակման հիմնական նպատակ անվանվել էր Ռուսաստանի դեմ պայքարը: