Քննչական կոմիտեն տեղեկացնում է, որ բավարար ապացույցներ են ձեռք բերվել պաշտպանության նախկին նախարար Վիգեն Սարգսյանին պաշտոնեական լիազորություններն անցնելու դեպքով որպես մեղադրյալ ներգրավելու համար։ «Քրեական գործով հիմնավորվել է, որ ՀՀ կառավարության 07.03.2007թ. թիվ 384-Ն որոշմամբ և ՀՀ պաշտպանության նախարարի 19.03.2013թ. թիվ 287 հրամանով ՀՀ ՊՆ հաշվեկշռում գտնվող տարածքների, բացառությամբ ՀՀ պաշտպանության նախարարի կողմից հաստատված ցանկում ներառված տարածքների, որոնք ենթակա չեն սեփականության իրավունքով տրամադրման, անհատույց օգտագործման իրավունքով բնակարանային պայմանների բարելավման կարիք ունեցող զինծառայողներին տրամադրման հարցի քննարկման լիազորությունը վերապահված է եղել ՀՀ ՊՆ կենտրոնական բնակարանային հանձնաժողովին, որը պետք է ղեկավարվեր ՀՀ կառավարության 07.03.2007թ. թիվ 384-Ն որոշմամբ, սակայն Երևան քաղաքի Գ. Հասրաթյան փողոցի 25/6 շենքի թվով 71 բնակարաններից 29-ի հատկացումների վերաբերյալ որոշում է կայացրել ՀՀ պաշտպանության նախարարը, և այդ բնակարանների հատկացման հարցն ընդհանրապես չի քննարկվել հանձնաժողովի կողմից, իսկ հանձնաժողովի քննարկման արդյունքում նշված շենքի մի շարք բնակարաններ, ՀՀ պաշտպանության նախարարի հանձնարարությամբ, հանձնաժողովի կողմից հատկացվել են ՀՀ կառավարության վերոնշյալ որոշմամբ սահմանված կարգի խախտմամբ, ինչի հետևանքով էական վնաս է պատճառվել ՀՀ ՊՆ համակարգի մշտական բնակմակերեսի կարիքավոր զինծառայողների իրավունքներին, վերջիններիս և պետության օրինական շահերին»։
Վիգեն Սարգսյանը շտապեց հայտարարել, որ բնակարանների բաշխման գործընթացն իրականացվել է օրենքի պահանջներին համապատասխան՝ հստակ սկզբունքներով և չափանիշներով:
Փաստաբան Հմայակ Ղարիբյանը «Առաջին լրատվական»-ին ներկայացնում է մանրամասներ, թե բնակարանների բաշխման գործընթացն ինչպիսի ապօրինություններով է տեղի ունեցել։ «Այս գործը սկսվել է նրանից, որ ինձ են դիմել ՀՀ Զինված ուժերի երկու սպա եղբայրներ՝ Արմեն և Արամ Կիրակոսյանները, իրենց խնդրով և ներկայացրել են իրավիճակը, որին առնչվելիս են եղել երկար տարիներ: Մենք քննարկեցինք իրադրությունը, օրենսդրական հիմքերը վերլուծեցինք և միասին որոշեցինք, որ այս գործով արդարության հասնելու միակ ճիշտ ճանապարհը հաղորդում տալն է ենթադրյալ հանցագործության մասին: Այդպես էլ արեցինք: Սկսվեց նյութերի նախապատրաստում: Մենք խնդրել էինք, որ միանգամից քրեական գործ հարուցվեր և դրա համար հիմքերը ներկայացրել էինք»,- նշեց փաստաբանը:
Արմեն և Արամ Կիրակոսյանները երկվորյակ եղբայրներ են, ծառայում են Վազգեն Սարգսյանի անվան համալսարանում, նրանցից մեկը՝ Արմենը, հիմա էլ շարունակում է ծառայել և բարձրաստիճան սպա է՝ փոխգնդապետ․ «Ես մեծ պատվով ուզում եմ ասել, որ հանդիսանում եմ այն զինծառայողների փաստաբանը, ովքեր խիզախել են առաջինը ներկայացնել այս գործը հանրությանը և այն մարմիններին, ովքեր իրավասու են քրեական գործ հարուցել և լուծել այս հարցը: Մենք հասկանում ենք, որ կան մարդկային գործոններ, ենթակայության հարաբերություններ, և կան ռիսկեր իրավապահ մարմիններին դիմելիս, սակայն նրանք չեն ընկրկել այդ ռիսկերի առջև: Ես հարցրել եմ՝ արդյոք պատրա՞ստ են մինչև վերջ գնալ և ընթացքում ծագած խոչընդոտները հաղթահարել, նրանք ասել են՝ այո: Ուրախությամբ եմ ուզում ասել, որ նրանց այդ վարմունքը արդարացված է, որովհետև արդեն մի քանի ամիս է՝ ընթանում է այս նախաքննությունը, և նախաքննական մարմինը բավականին ծավալուն և խոր նախաքննություն է իրականացրել»:
Մանրամասն՝ տեսանյութում։