Ազգային ժողով է ուղղարկվել 2020 թվականի բյուջեն, որն իր մեծությամբ այսօր աննախադեպ է որակվում։ Եկող տարվա բյուջեի եկամուտների մասը շուրջ 200 միլիարդ դրամով ավելի է այս տարվա պլանավորված չափից, իսկ ծախսերն ավելի է շուրջ 240 միլիարդ դրամով։ ՀՀ Կենտրոնական բանկի նախկին նախագահ Բագրատ Ասատրյանը գտնում է, որ իր մեծությամբ աննախադեպ էր 2019 թվականի բյուջեն, այլ ոչ թե գալիք տարվա բյուջեն․ նա 2020 թվականի բյուջեն ընդհանրապես աննախադեպ չի համարում։
Ինչպիսի՞ն են ձեր դիտարկումները․ «Առաջին լրատվական»-ի հարցին «Տնտեսական իրավունքի կենտրոն» ՀԿ նախագահ Մովսես Արիստակեսյանը պատասխանեց․ «Բյուջեն ամբողջությամբ չեմ հասցրել ուսումնասիրել։ Այն ունի լուրջ քննարկման կարիք, որպեսզի հետևություններ արվի աննախադեպության մասին։ Սոսկ միայն թվերի մասին խոսելով, իհարկե, տնտեսական հեղափոխության լոզունգի տակ մենք ակնկալում ենք տնտեսության շատ ավելի մեծ զարգացում, քան հարկային մուտքերի ավելացումը։ Եթե մենք նայում ենք մակրոտնտեսական ցուցանիշները, ապա տեսնում ենք, որ ՀՆԱ-հարկեր հարաբերությունն ընդամենը 1,2 տոկոսով է բարձրանում։ Մինչդեռ, մենք գիտենք, որ ճիշտ է՝ մեծ աշխատանք է կատարվել, բայց ստվերն այսօր էլ կա տնտեսության մեջ։ Ավելին, մակրոտնտեսական ցուցանիշներով նախատեսված է 4,3 տոկոս տնտեսական աճ՝ այս տարվա նախատեսված 6,9 տոկոսի դիմաց։ Եթե 6,9 տոկոսն իջել է 4,3 տոկոսի, ապա ինչն է այստեղ աննախադեպը։ Եվ ես կասեմ, որ երկրում դարձյալ բացակայում է ռազմավարական ծրագիրը»։
Իսկ «Իմ քայլը» խմբակցության պատգամավոր Գևորգ Պապոյանն էլ ասաց․ «2020 թվականի բյուջեն աննախադե՞պ է, թե՞ ոչ։ Տեսեք, ցանկացած բյուջե կարելի է համարել աննախադեպ կամ ոչ, եթե այն որոշակի չափով մեծ է իր նախորդից և գերազանցում է նախորդի ցուցանիշները։ Այդ իմաստով, իմ գնահատմամբ, այո, 2020 թվականի բյուջեն 2019-ի համեմատ աննախադեպ է, բայց եթե նայենք աճը, ապա առաջին անգամ 2020 թվականի բյուջեով ծախսային մասը հասնում է 4 միլիարդ դոլարի»։
Մանրամասները՝ տեսանյութում։
