Արցախը պատկանում է այն մարդկանց, որոնք ապրում են այդ հողի վրա և որոնց նախնիներն են ապրել այդ հողի վրա և ապելու են այդ հողի վրա, քանի որ բազմիցս ապացուցել են, որ պատրաստ են պաշտպանել իրենց անվտանգությունը և իրենց ապրելու իրավունքը ադրբեջանական ագրեսիայից։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Տաթևիկ Հայրապետյանը՝ անդրադառնալով Ադրբեջանի նախագահ Իլհամ Ալիևի այն հայտարարությանը, թե «Ղարաբաղը Ադրբեջան է»։
Նա հիշեցրեց, որ այս մասին ինքը խոսել է ԵԽԽՎ-ում այն ժամանակ, երբ ԵԽԽՎ-ում ադրբեջանցի պատվիրակները փորձել էին անդրադառնալ ՀՀ վարչապետի «Արցախը Հայաստան և վերջ» հայտարարությանը։
«Ինձ համար տարօրինակ է մի քանի բան. նախ ինչո՞ւ է Ալիևի այս հայտարարությունը գալիս ՀՀ վարչապետի հայտարարությունից երկու ամիս անց։ Երկրորդ, մենք ակնկալում էինք Ալիևի արձագանքը ոչ թե վարչապետի այս հայտարարությանը, որը բազմիցս նշվել է, որ արվել է համահայկականության համատեքստում, այլ երեք ժողովուրդների միջև խաղաղության հաստատմանը վերաբերող հայտարարությանը»,-ընդգծեց Հայրապետյանը։