Վանաձորում տեղի ունեցած ողբերգական ողբերգությունը, որը խլեց չորս հոգու կյանք, հետևանք է այն հանցավոր մտայնության, արժեքային համակարգի, որը տարիներ շարունակ տիրում է փողոցում, քրեակատարողական հիմնարկներում, որ հրազենի կամ այլ ապօրինի միջոցներով հարցերի լուծումը դարձել է որոշ մարդկանց կենսակերպը: Այս մասին մեզ հետ զրույցում նշեց փաստաբար Նորայր Նորիկյանը՝ անդրադառնալով Վանաձորում այսօր գիշերը տեղի ունեցած քրեական «ռազբորկային»:
Նշենք, որ նախօրեին Վանաձոր քաղաքի Միչուրինի 20 տանը տեղի է ունեցել «ռազբորկա», հնչել են կրակոցներ: Ոստիկանները այդ տանը հայտնաբերել են եղբայրներ 30-ամյա Անդրանիկ Օհանյանի և 25-ամյա Դավիթ Օհանյանի դիերը: Եվս մեկը մահացել է հիվանդանոցում: Վիրավորվել է 5 մարդ:
Նորայր Նորիկյանի խոսքով, ոստիկանության գործունեության մեջ շատ առանցքային և կարևոր դեր ու նշանակություն ունի հանցագործությունների կանխումը, նախականխումը, բացահայտումը, որոշակի սոցիալական շերտերի հետ աշխատանքներ իրականացնելը, հասարակական կարգի պահպանումը, հանցավորության դեմ պայքարը. «Այս առումով, հանցավոր մտայնությամբ ապրող սոցիալական այդ շերտը մարտահրավեր է մեր հասարակական անդորրին, հանրային կյանքին, որի վերջաբանը հենց այս մարդկային զոհերն են, մարդկային ողբերգությունները:
Եթե նկատել եք, վերջին ամիսներին հրազենի միջոցով հարց լուծելու տխրահռչակ ավանդույթը շարունակվում է: Սա ըստ էության, սա միայն մայրաքաղաքային խնդիր չէ, համահայաստանյան խնդիր է: Այդ մտայնություն ուղղակի չարիք է մեր հասարակության համար: և այդ չարիքը արմատախիլ անելուն միտված մարմինը հենց ոստիկանությունն է, որը ուղղակի պարտավոր է պարզապես պատերազմ հայտարարել հանցավոր աշխարհի դեմ և հասնել դրան, որ հենց բնում ոչնչացնեն այդ ծիլերը, այդ հանցավոր մտայնությունները, որպեսզի մենք ականատես չլինենք այսպիսի ողբերգական դեպքերի»,-ասաց նա:
Հարցին, թե ինչպես է գնահատում քրեական ենթամշակույթի դեմ պայքարին ուղղված օրենսդրական նախաձեռնությունը, որով հանդես է եկել իշխանությունը, փաստաբանն արձագանքեց. «Ես ընդհանրապես, ողջունել եմ այդ օրենքի նախագիծը և համարում եմ, որ դա գործիքներից մեկն է, բայց ես նաև հեռու եմ այն մտքից, որ միայն օրենքների միջոցով հնարավոր է հասարակության միջից արմատախիլ անել այդ բացասական երևույթները: Օրենքները օժանդակող, կարգավորող, արգելող, թույլատրող նորմատիվ ակտեր են, որոնցով կարգավորվում են հասարակական հարաբերությունները: Բայց մենք նաև ունենք կրթական, դաստիարակչական, հոգեբանական, բարոյական խնդիրներ: Այս առումով այդ աշխատանքին պետք է լծվեն ոչ միայն իրավասու մարմինները, ուժային կառույցները, օրենսդիր իշխանությունը, այլ նաև դպրոցը, մշակույթը, հասարակությունը: Սա գլոբալ մարտահրավեր է մեր հասարակությանը: Սրանք կեղծ արժեքներ են, ոչ ֆորմալ ինստիտուտներ են, որոնք ուղղակի առկա են մեր հասարակության որոշակի շերտի մոտ, որոնց գործունեության արդյունքում արձանագրվում են այսպիսի ողբերգական դեպքեր»:
Նա հավելեց, որ երբ խոսում ենք նոր որակի ոստիկանության մասին, այդ նոր որակի ոստիկանությունը շատ լուրջ անելիք ունի, նոր ոստիկանապետի առջև ծառացած է լրջագույն խնդիր:
«Մենք պետք է նախևառաջ կարողանանք մեր հանրային գիտակցությունից դուրս շպրտել միլիցու, գաիշնիկի, մարդկանց գլխին սարքելու այդ տխրչահռչակ մտայնությունը: Քաղաքացու հետ պետք է աշխատել այնպես, պետք է ստեղծել այնպիսի արժեքային համակարգ, որ մենք բոլորս գիտակցենք, որ ոստիկանությունը ոստիկանը համազգեստավոր քաղաքացին է, իսկ հասարակությունը հենց ինքը ոստիկանություն է: Հասարակությունն ինքը պետք է գիտակցի, որ պետք է աջակցի, օժանդակի, ստեղծի այնպիսի սոցիալական միջավայր, որ հանցագործության դեմ պայքարում բոլոր ուժերը ներգրավված լինեն: Բայց երբ մենք ստեղծում ենք միջավայր, որ հանցավորության այդ կեղծ պատկերը թաքցվում է, չի հայտնաբերվում, որոշ տեղերում նաև խրախուսվում է, սրա արդյունքն այս ողբերգական իրավիճակն է:
Դրա համար եմ ասում, որ ոստիկանությունը պետք է վերափոխվի, որ մարդկանց գիտակցությունից դուրս շպրտվի այդ արատավոր մտայնությունը ոստիկանության հանդեպ, ու ոստիկանն ընկալվի որպես հասարակության պաշտպանը, հասարակական կարգի, օրենքի պաշտպանը, պետության պաշտպանը: Քանի դեռ մենք չենք ստեղծել այդ կարգի ոստիկանություն, լինելու են մարդիկ, որոնք մտածելու են, որ իրենք պետք է հարցերը լուծեն սեփական պատկերացումների շրջանակներում: Իսկ այդպիսի պատկերացումներով հարցեր լուծելն ավարտվում է այսպիսի հանցավոր, գողական ողբերգական միջադեպերով»,-ընդգծեց Նորայր Նորիկյանը:
