Մինչև 2025 թվականը այն ուղղորդիչ փաստաթղթերը, որոնք ընդունված են, այնտեղ ամրագրված է, որ ԵՏՄ-ում պետք է լինի մասնական էներգետիկ շուկա: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր, տնտեսագետ Արտակ Մանուկյանը:
«Ենթադրում եմ, որ մենք պետք է աստիճանաբար տեսնեինք դրան միտված վեկտորային քաղաքականություն: Առաջինը օրենսդրության հարմոնիզացիայի մասով, 4 տիպի ազատությունները կարգավորելուց հետո , նաև պրակտիկ առումով այն բոլոր գործարքային խնդիրները, որ կան, այդ ամենը շտկելուց հետո շատ կարևոր է, որ մենք կարողանանք միասնական ընդհանուր շուկայի գաղափարից համընդհանուր օգուտներ ստանալ, ոչ թե օգուտներ ստանան միայն մեկ կամ մի քանի երկրները»,-ասաց Արտակ Մանուկյանը:
Անդրադառնալով գազի թանկացման հեռանկարին, նա ընդգծեց. «Իհարկե, գազի գնագոյացումը պետք է արդարացի լինի: Բայց որպեսզի ամեն տարի գազի գնի շուրջ բանակցություններ չիրականացնենք, կարևոր է, որ ֆիքսենք գազի գինը երկար ժամանակահատվածում: Դա կարևոր է նաև բիզնեսի համար»:
