Վերակառուցման և զարգացման եվրոպական բանկը (ՎԶԵԲ) 60 մլն դոլար է հատկացրել ինը կիլոմետր երկարությամբ թունելի շինարարության համար, որը Մցխեթ-Ստեփանծմինդա-Լարս մայրուղու բաղկացուցիչ մասն է: Այդ մասին ասված է Վրաստանի ավտմոբիլային ճանապարհների դեպարտամենտի հաղորդագրության մեջ՝ հաղորդել է Sputnik-ը:
Կվեշեթի-Կոբի ճանապարհի շինարարությունը բաժանված է երկու տեղամասի: Ընդամենը պլանավորված է 22,7 կիլոմետր ասֆալտ-բետոնե ճանապարհի, վեց կամրջի և հինգ թունելի կառուցում, ներառյալ ինը կիլոմետրանոց թունելը: Կվեշեթի-Կոբի թունելի լայնությունը կկազմի 15 մետր, ինչը բավական հազվադեպ է հանդիպում աշխարհում: Ճանապարհը կշրջանցի աշխարհագրական առումով բարդ երթուղին, որը ձմռանը ծածկվում է առատ ձյունով: Նախագծի մոտավոր արժեքը 558,6 մլն դոլար է: Ճանապարհի շինարարությունը ֆինանսավորելու են Զարգացման ասիական բանկը և ՎԶԵԲ-ը, որոնք Վրաստանին վարկեր են հատկացրել համապատասխանաբար 415 մլն դոլարի և 60 մլն դոլարի չափով, ինչպես նաև Վրաստանի կառավարությունը, որը կհատկացնի 83,6 մլն դոլար: Շինարարության սկիզբը պլանավորված է 2020 թվականին,: