Սաուդյան Արաբիայի իշխանություններն առաջին անգամ կանանց թույլատրել են ծառայել երկրի զինված ուժերում: Այդ մասին հոկտեմբերի 3-ին հայտնել է Asharq al-Awsat պարբերականը:
Հրատարակության հաղորդման համաձայն, այսուհետև կանայք կկարողանան ծառայել բոլոր զորատեսակներում՝ շարքայինից մինչև սերժանտի կոչումով: Սաուդյան Արաբիայի քաղաքացիական պաշտպանության գործողությունների կենտրոնի նախկին ղեկավար Հասան աշ-Շահրին պարբերականին տված մեկնաբանության մեջ այդ որոշումը համարել է «առաջադիմական քայլ՝ ճիշտ ուղղությամբ»: Նրա տեսակետով՝ զինված ուժերում կանանց համար բացվում են «լայն հնարավորություններ»: Մինչև վերջին ժամանակներս Սաուդյան Արաբիան համարվում էր ոչ միայն ամենափակ արաբական երկիրն աշխարհում, այլև ամենապահպանողականը՝ կանանց նկատմամբ: Սալման բեն Աբդել Ազիզ ալ Սաուդ թագավորի և նրա որդու՝ Մուհամեդ բեն Սալման ալ Սաուդի իշխանության գալով՝ իրադրությունն արմատապես փոխվել է:
Առաջընթացի գլխավոր շարժիչը դարձել է «Տեսլական-2030» ընդունված պլանը, որը ներառում է տնտեսական և սոցիալական համալիր բարեփոխումներ, որոնք, մասնավորապես, վերաբերում են կանանց դրությանը և նրանց թույլ են տալիս դառնալ հասարակության լիիրավ անդամներ, հաղորդել է ՏԱՍՍ-ը:
