Հակակառավարական ցույցեր են բռնկվել Իրաքի մայրաքաղաք Բաղդադում և մի շարք նահանգներում: Անվտանգության ուժերը բերվել են առավելագույն մարտունակության վիճակի, հայտնում է Al Arabiya-ն:
Բողոքի ցույցերը սկսվել են նախօրեին՝ ընդդեմ կյանքի վատ պայմանների, գործազրկության և կոռուպցիայի: Ցուցարարները Բաղդադում, Քերբելում, Բասրեում, Էդ-Դիվանիայում, Էն-Նասիրիայում պահանջում են կառավարության հրաժարականը: Ակցիաները արագորեն վերածվել են ոստիկանների հետ բախումների, որոնք ցուցարարներին ցրելու համար տաք ջրով ջրցաններ, արցունքաբեր գազ են օգտագործել, ինչպես նաև նախազգուշական կրակողներ են արձակել:
Անկարգությունների հետևանքով զոհվել է 2 մարդ, 265-ը վիրավորվել են, տասնյակ մարդիկ ձերբակալվել են:
Արդեն այսօր ցուցարարները մի շարք նահանգներում գրոհել են տեղի ինքնակառավարման մարմինների շենքերը:
Իրավիճակը Բաղդադում ևս շարունակում է մնալ լարված: Մայրաքաղաքի կենտրոնին հարող թաղամասերում կրակոցներ են հնչել: Հայտնի է, որ ցուցարարները փակել են Բաղդադի միջազգային օդանավակայանի ճանապարհները: Բացի այդ, նրանք արգելափակել են երկրի գլխավոր քաղաքը մյուս նահանգների հետ կապող մի շարք երթուղիներ:
Ընդհանուր առմամբ, ինչպես ասվում է Իրաքի մարդու իրավունքների բարձր հանձնաժողովում, անկարգությունների հետևանքով զոհվել է չորս մարդ, վիրավորվել են գրեթե 300-ը:
Կապի նախարարությունը կարգադրել է արգելափակել սոցցանցերը՝ Facebook-ը, Twitter-ը, WhatsApp-ը և մի շարք ինտերնետային ռեսուրսներ, որոնց միջոցով բողոքի ակցիաներին միանալու կոչեր են տարածվում:
