Հայաստանում ԵՏՄ աննախադեպ Վեհաժողովի՝ Իրանի նախագահի մասնակցությամբ,, Պուտինի այցի, Ռոբերտ Քոչարյանի գործոնի ֆոնին հանրային ուշադրությունից որոշակի դուրս է մնացել ԱՄՆ Կոնգրեսի հայկական հարցերի հանձնախմբի ղեկավար, Ներկայացուցիչների պալատի Կոնգրեսական Ֆրենկ Փալոունի այցը Արցախ, որը ԱՄն կոնգրեսականի առաջին այցն է Արցախի հանրապետություն: Փալոունին ընդունել են Արցախի նախագահն ու արտաքին գործերի նախարարը: Անշուշտ, ԱՄՆ կոնգրեսականի այցը պաշտոնական չէ, այսինքն չի ներկայացնում ԱՄՆ օրենսդիր մարմնի պաշտոնական դիրքորոշում, մյուս կողմից սակայն տվյալ պարագայում էականը այսպես ասած կարգավիճակաին ֆորմալությունը չէ, այլ հանգամանքը:
Բանն այն է, որ անկախ դիրքորոշումներից և կարգավիճակներից, մինչ այժմ ամերիկյան իսթեբլիշմենտի ներկայացուցիչները ձեռնպահ են մնացել Արցախում լինելուց և այդ առումով Ֆրենկ Փալոունի այցը աննախադեպ լինելով, գործնականում նոր իրավիճակ արձանագրող այց է: Դա չի նշանակում, որ նրանից հետո ամերիկացի գործիչները հերթ են կանգնելու Արցախ այցելելու համար, բայց խնդիրն այն է, որ մեկ գործչի այցն արդեն իսկ վկայում է մինչ այժմ եղած որոշակի իրավիճակի ճեղքում, հաղթահարում և նոր իրողություն:
Նաև դա է պատճառը, որ կոնգրեսականի արցախյան այցը ադրբեջանական մամուլում ոչ միայն ինքնին քննադատության է արժանացել՝ դա տեղի է ունենում նշանակալի և աննշան բոլոր դեպքերում, այլ արժանացել է քննադատության նաև արտգործնախարար Մամեդյարովի գործունեությունը թիրախավորելու առումով: Այսինքն, Ադրբեջանը բավականին ծանրակշիռ փաստ է դիտարկում Ֆրենկ Փալոունի արցախյան այցը, այն դարձնելով ընդհուպ արտգործնախարարի աշխատանքի քննադատության փաստարկ: Իհարկե այստեղ իր դերն է խաղում և այն, որ Ադրբեջանի ներիշխանական ճամբարում Մամեդյարովի հանդեպ տրամադրությունները մեղմ ասած բազմիմաստ և հակասական են վաղուց, և Ադրբեջանի իշխանության մեջ այդ իրավիճակն արտացոլում է տարբեր թևերի միջև պայքարը նաև դիվանագիտական այդ դիրքի համար: Սակայն, այդ հանգամանքով հանդերձ, ակնառու է, որ թիրախավորելու համար պետք է գտնվի ծանրակշիռ պատճառ, այդ թիրախավորումը ծանրակշիռ դարձնելու համար:
Ի դեպ, այդ տեսանկյունից խիստ ուշագրավ կլինի, թե արդյո՞ք ամերիկացի կոնգրեսականի արցախյան այցը կհանգեցնի Ադրբեջանում արտգործնախարարի փոփոխության, որի խորքային պատճառները՝ ինչպես նկատեցինք, հասունանում են իհարկե վաղուց: