Մարտի 1-ի գործով նախկին ոստիկանապետ Ալիկ Սարգսյանի վերաբերյալ Հատուկ քննչական ծառայության հաղորդագրությունից, ըստ էության, պարզ է դառնում, որ նախկին իրավապահ համակարգն ամբողջությամբ լցված էին Մարտի 1-ի իրադարձությունների վերաբերյալ փաստաթղթերի և ապացույցների կեղծմամբ։ Հետին թվով հրամաններ, փաստաթղթեր են պատրաստվել, ներկայացվել տարբեր մարմինների, այդ թվում՝ Եվրոպական դատարան։ Այսօր արդեն կարծիքներ են հնչում, որ գուցե կեղծիքներ են եղել նաև դատաբժշկական փորձաքննությունների ընթացքում։
Եթե իրադարձությունների վերաբերյալ փաստաթղթերը, ապացույցները կեղծվել են, ապա արդյոք երաշխիք ունե՞նք, որ նույն դատաբժշկական փորձաքննությունները կեղծված չեն․ «Առաջին լրատվական»-ի հարցին փաստաբան Կարապետ Բադալյանը պատասխանեց․ «Մարտի 1-ի գործի հետ կապված, ովքեր որ առնչություն են ունեցել՝ այն ժամանակ որոշակի իշխանական լիազորություններ են իրականացրել, բոլորն էլ մինչև հիմա պնդում են, որ ամեն ինչ եղել է օրենքի շրջանակներում՝ պահպանել են օրենքի պահանջները։ Բայց գործի քննության ընթացքը և ջրի երես դուրս եկող ապացույցները հակառակն են վկայում։ Այսինքն՝ ամբողջ գործընթացն ուղեկցվել է օրենքի խախտումներով։ Ամեն դեպքում, այս ամբողջ գործընթացը, մեղմ ասած, եղել է արատավոր»։
Իսկ փաստաբան Արա Կարագյոզյանն էլ ասաց․ «Ես ներգրավվել եմ Մարտի 1-ի գործով Անդրանիկ Հարությունյանի ներկայացուցիչ, և քննության նյութերին ծանոթանալով, պարզապես աբսուրդի եմ հանգում։ Իմ վստահորդն այդ օրն աչքին հրազենային վնասվածք է ստացել, բայց փորձաքննությունով դատաբժիշկը նշում է, որ չեն կարող հայտնել՝ Անդրանիկ Հարությունյանն աչքին հրազենո՞վ է վնասվածք ստացել, թե՞ փայտի հարվածից է առաջացել այդ վնասվածքը, քանի որ այդ ժամանակ բժշկական հաստատություն դիմելու փաստաթղթերը չկան։ Սա ի՞նչ է իրենից ենթադրում։ Ըստ էության՝ այդ փորձաքննության արդյունքները լիարժեք չեն»։
Մանրամասները՝ տեսանյութում։
