Օրեր առաջ, ԱՄՆ կատարած այցի ժամանակ, ՄԱԿ-ի կենտրոնակայանում, ՄԱԿ-ի Գլխավոր ասամբլեայի 74-րդ նստաշրջանում ՀՀ վարչապետ Նիկոլ Փաշինյանն իր ելույթում անդրադառնալով Լեռնային Ղարաբաղի հակամարտության լուծման տարբերակներին, նշել էր․ «ԼՂ հակամարտության ցանկացած լուծում պետք է ընդունելի լինի Հայաստանի, Լեռնային Ղարաբաղի և Ադրբեջանի ժողովուրդների համար»։ Փաշինյանը տեղեկացրել էր նաև, որ ինքն առաջին հայ ղեկավարն է, որ նման դիրքորոշում է հայտնել հակամարտության կարգավորման վերաբերյալ, ինչի համար էլ իր երկրում իրեն խստորեն քննադատել են լուծման այնպիսի տարբերակի համար, որը հավասարության նշան է դնում հակամարտության երեք կողմերի միջև։
Արցախի ԱԺ պատգամավոր, «Ազգային վերածնունդ» կուսակցության նախագահ Հայկ Խանումյանից հետաքրքրվեցինք, թե ինչ արձագանքներ է գտել Փաշինյանի ելույթն Արցախում, կարո՞ղ է գտնվել նման տարբերակ, որն ընդունելի լինի երեք երկրների ժողովուրդների համար։
«Գործնականում այսօր չկա մի լուծում, որը ընդունելի լինի Ստեփանակերտում, Երևանում և Բաքվում միաժամանակ: Դա կարող է լինել տեսականորեն: Խնդիրն այն է, որ նույնիսկ տեսականորեն նման տարբերակի ընդունումն Ադրբեջանում անհնարին են համարում: Սա նշանակում է, որ Հայաստանի վարչապետը տեսականորեն պատրաստ է լինել կառուցողական, իսկ Ադրբեջանը` ոչ: Հարցը նման կերպ լուծում չունի, և դա շատ լավ գիտակցում է նաև Փաշինյանը: Խնդիրն այստեղ այլ է` ինչպե՞ս կօգտագործի հնարավոր ստատուս քվոն հայկական կողմը: ՀՀ նոր կառավարությունը երբեք պարտվողական, հողատվական հայտարարություններ չի արել, զգալիորեն բարելավել է զինծառայողների կենցաղը և դրամական եկամուտները, զբաղված է սպառազինության արդիականացմամբ և Արցախում ենթակառուցվածքային մեծածավալ ծրագրերի աջակցությամբ»,- արձագանքեց Հայկ Խանումյանը։
Մեր դիտարկմանը, որ Փաշինյանն իր ելույթում շեշտադրումներ է արել նաև մեր անվտանգությանը վերաբերող հարցերին, Թուրքիայի հետ հարաբերությունների բարելավմանը, որքանո՞վ կարող են այդ հնչեցրած հարցերը լուծել մեր անվտանգության խնդիրները, Հայկ Խանումյանը պատասխանեց․ «Ոչ մի հայտարարություն էլ չի կարող անվտանգային հարցեր լուծել: Նման հարցերը լուծվում են կոնկրետ գործողություններով, ինչպես վերը նշեցի ՀՀ նոր իշխանությունները զգալիորեն բարձրացրել են Արցախի անվտանգային մակարդակը և այդ ուղղությամբ բազմաթիվ նոր ու մեծամասշտաբ ծրագրեր կան»: