Երևանի պետական համալսարանի 100-ամյակին նվիրված հանդիսավոր միջոցառման ժամանակ ՀՀ վարչապետ Նիկոլ Փաշինյանը հայտարարել է, որ առաջիկա տասը տարվա ընթացքում ցանկանում է ԵՊՀ-ն տեսնել աշխարհի լավագույն 500 համալսարանների շարքում։
Ցանկությունը՝ ցանկություն, բայց որքանով կարող է այն կյանքի կոչվել մեր կարծրացած պատկերացումներով առաջնորդվող բուհական համակարգում։ Ի՞նչ փոփոխություններ պետք է իրականացվեն, ի՞նչ ներդրումներ պետք է կատարվեն, որպեսզի ԵՊՀ-ն արդիականանա, կարողանա մրցունակ լինել աշխարհում հայտնի և ճանաչված շատ համալսարանների հետ։
Կրթության փորձագետ Սերոբ Խաչատրյանը «Առաջին լրատվական»-ի հետ զրույցում նշում է, որ եղել են դեպքեր, երբ որոշ երկրների հաջողվել է համալսարանները կարճ ժամանակում ընդգրկել լավագույնների ցուցակում։ Սակայն, ըստ նրա, դրանք այն համալսարաններն են, որոնք նոր են ստեղծվել և որտեղ կատարվել են ֆինանսական հսկայական ներդրումներ՝ ընդհուպ մինչև Նոբելյան մրցանակակիր դասախոսներ հրավիրելը։ Ըստ փորձագետի՝ լավագույն համալսարանների ցանկում ընդգրկվելու համար պետք է ունենաս լավագույն դասախոսական կազմ։
«Եղել են դեպքեր, երբ ֆինանսական հսկայական ներդրումներով որոշ համալսարաններ կարողացել են ընդգրկվել այդ մի քանի հարյուրի մեջ, բայց դրա համար արվել են հսկայական ֆինանսական ներդրումներ։ Եվ ԵՊՀ-ի համար էլ պետք է այդ ներդրումներն արվեն, որպեսզի նա կարողանա ընդգրկվել լավագույնների մեջ։ Ես կասեի, որ այդ լավագույնների ցուցակները հարաբերական են, այսինքն՝ մենք կարող ենք ավելի իրատեսական խնդիր լուծել, քան մեկ համալսարանի համար լավագույն արդյունքներ ապահովել, իսկ մյուսներին՝ հետ թողնել։ Ես ավելի կողմնակից կլինեմ, եթե բոլոր համալսարանները համաչափ զարգացնենք, քան ամբողջ ռեսուրսը ներդնենք, մեկ համալսարան ընդգրկենք 500-ի ցանկում, իսկ մյուսներին անտեսենք։ Այդ առումով համաչափ զարգացման տեսանկյունից դա ավելի կարևոր է, քան ռեսուրսները մեկ համալսարանին ուղղելը»,- նշեց Սերոբ Խաչատրյանը։
Նրա կարծիքով՝ եթե կրթության ոլորտի համար հավակնոտ հայտարարություններ ես անում, ապա պետք է կատարվեն հսկայական ներդրումներ։
«Փոփոխությունների համար, հատկապես համալսարաններում, պետք է ֆինանսական հսկայական բազա։ Ենթակառուցվածքների առումով էլ, եթե նայում ենք, ապա դասախոսական ամբիոնները շատ փոքր են, նստելու տեղեր չկան, պետք է անհատական աշխատանքներ կատարվեն ուսանողների հետ։ Եթե ամբիոնների սենյակները շատ փոքր են, ապա որտեղ պետք է կատարվեն այդ աշխատանքները»,- նշեց կրթության փորձագետը՝ հավելելով, որ պետք է համալսարանում զարգացնեն հետազոտական կարողությունները։ Իսկ այդ ամենի համար, ըստ նրա, պետք է կատարվեն շատ մեծ ներդրումներ, ոչ թե միլիոնների, այլ միլիարդների։
Կրթության, գիտության, մշակույթի և սպորտի նախարարի խորհրդական, ԵՊՀ դասախոս Սամվել Կարաբեկյանը կարծում է, որ լուրջ բարեփոխումներ անելու դեպքում ԵՊՀ-ի՝ աշխարհի լավագույն 500 բուհերի ցանկում հայտնվելն անիրատեսական չէ։
«100-ի կամ 80-ի մեջ՝ չէ, բայց 500-ի մեջ լուրջ գործ անելու դեպքում լրիվ իրատեսական է։ Պետք է անել լուրջ բարեփոխումներ, որպեսզի 10 տարի հետո հավակնենք այդ 500-ի մեջ մտնելուն։ Դրա համար պետք է լինի որոշակի ծրագիր, որի՝ կյանքի կոչելուն նախարարությունն իր իրավասությունների շրջանակում պետք է նպաստի։ Բուհն ինքնավար մարմին է, որը ծրագիր է կազմում և առաջ շարժվում, նախարարությունն էլ կաջակցի»,- նշեց Սամվել Կարաբեկյանը։