Երևանում հոկտեմբերի 1-ին մեկնարկել է «Եվրասիական աշխարհի տարանցիկ ներուժը» թեմայով ԵԱՏՄ վեհաժողովը: ԵԱՏՄ բարձրագույն խորհրդի ընդլայնված նիստին մասնակցում են ոչ միության անդամ երկրների ղեկավարները, այլ նաև Սինգապուրի և Իրանի նախագահները՝ հրավիրյալ երկրների ղեկավարների կարգավիճակով, և Մոլդովայի նախագահը՝ որպես դիտորդի կարգավիճակում գտնվող երկրի ղեկավար:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետներ Արմեն Վարդանյանը և Վարդուհի Հարությունյանը:
Արմեն Վարդանյանն անդրադառնալով հարցին, թե որոնք են Հայաստանի հիմնական ակնկալիքներն այս միջոցառումից, նշեց. «Մեր երկիրը շատ լուրջ խնդիրներ ունի ԵԱՏՄ-ում, ցանկացած մաքսային միություն պետք է ապրանքների, մարդկանց ազատ տեղաշարժվելու հնարավորություն տա, բայց Վերին Լարսում անընդհատ խնդիրներ են առաջանում, հայկական բեռնատարները չեն կարողանում անցնել Ռուսաստանի սահմանը, այնտեղ մեծ կոռուպցիա կա. սա լուրջ խնդիր է հենց ԵԱՏՄ-ի համար: Հայաստանն ակնկալում է, որ, որպես միության անդամ, պայմանները հավասար լինեն: Խնդիրները շատ են, և շատ կցանկանայի, որ վարչապետն այդ մասին բարձրաձայնի»:
Վարդուհի Հարությունյանի խոսքով՝ ԵԱՏՄ-ն բավական մեծ ներուժ ունի միջազգային համագործակցության տեսանկյունից՝ ստեղծելով ազատ առևտրի գոտիներ և համագործակցության նոր ձևաչափեր: «2015թ-ից ԵԱՏՄ լիարժեք անդամ ենք, և կարծում եմ, որ ճիշտ կլինի փոխել շեշտադրումները, թե ինչ է պետք իրականացնել, որպեսզի մասնակցությունը ԵԱՏՄ-ին դառնա արդյունավետ»:
Մանրամասն՝ տեսանյութում: