Այսօր՝ հոկտեմբերի 1-ին, Ազգային ժողովը սկսում է իր հերթական նիստի աշխատանքները: ԱԺ պատգամավորների հայտարարությունների ժամին «Լուսավոր Հայաստան» խմբակցության պատգամավոր Աննա Կոստանյանը նշեց, որ «Արմօյլ» ընկերության մոտ բացակայում են գործարանի կողմից արտադրական գործընթաց սկսելու համար մի շարք անհրաժեշտ փաստաթղթեր. «Ընդհուպ մինչև ՇՄԱԳ փորձաքննության եզրակացությունը»:
Նրա խոսքով՝ «Արմօյլը» նախկին իշխանությունների տարբեր ներկայացուցիչների հետ համատեղ մի շարք փաստաթղթային խախտումներով իրականացրել էր շինաշխատանքներ. «Արդյունքում գործարանը պատրաստ է շահագործման»:
Պատգամավորը նշեց, որ «Արմօյլի» ներկայացուցիչները մոլորության մեջ են գցում հանրությանը և կառավարությանը՝ հայտարարելով, թե ընկերության գործունեությունը ՇՄԱԳ փորձաքննության ենթակա չէ. «Թե իբր բիտումի, քսայուղերի համար անհրաժեշտ չէ ՇՄԱԳ փորձաքննություն»:
Աննա Կոստանյանը ընդգծեց՝ «Արմօյլը» ի սկզբանե նպատակ է ունեցել նավթավերամշակմամբ զբաղվելու. «Կառավարությունը պետք է կասեցնի, այնուհետև ուսումնասիրի այս խնդրի իրավական և տեխնիկական կողմերը՝ կրկին անցկացնելով հանրային լսումներ»:
Մանրամասները՝ տեսանյութում: