Այսօր՝ հոկտեմբերի 1-ին, Ազգային ժողովը սկսում է իր հերթական նիստի աշխատանքները: ԱԺ պատգամավորների հայտարարությունների ժամին պատգամավոր Արման Բաբաջանյանն անդրադարձավ Վերին Լարսի անցակետում կայանված բեռնատարներին. «Ռուս մաքսավորների և այլ չինովնիկների ստեղծած արհեստական խոչընդոտների պատճառով մեր հայրենակիցները չեն կարողանում շարունակել իրենց ճանապարհը դեպի Ռուսաստան: Խնդիրը ամեն օրվա հետ խորանում է: Հայ վարորդների պնդմամբ՝ ռուս մաքսավորները ուղղակի կաշառք են պահանջում ուղեբեռը իրենց հայեցողությամբ կշռելու ու սահմանը հատելու թույլտվության դիմաց»:
Պատգամավորի խոսքով՝ Վերին Լարսի խնդիրը խրոնիկական է դարձել. «Այն ունի ինչպես աշխարհաքաղաքական, այնպես էլ տեխնիկական բնույթի, մանր կաշառակերության հետ կապված երանգներ: Դրա պատճառով մեր տնտեսությունը կորցնում է տասնյակ միլիոնավոր դոլարներ. Վերին Լարսը դարձել է մեր տնտեսության զարգացման արգելակներից մեկը, եթե ոչ՝ ամենագլխավորը»:
Արման Բաբաջանյանը նշեց՝ խնդիրը Ռուսաստանի կողմից օգտագործվում է քաղաքական նպատակներով՝ Հայաստանի նկատմամբ ուղղակի կամ ունուղղակի ճնշումներ գործադրելու համար. «Ցավոք, մինչև հիմա մենք Վերին Լարսի խնդրին ցուցաբերում ենք իրավիճակային մոտեցում և դրանով զբաղվում ենք միայն այն ժամանակ, երբ սահմանակետում խնդիր է առաջանում»:
Պատգամավորը կարծում է, որ Վերին Լարսի հարցն ունի արմատական հայեցակարգային լուծման կարիք. «Քանի որ հարցը վերաբերում է ՀՀ քաղաքական և տնտեսական անվտանգությանը և ուղղակիորեն առնչվում է մեր ինքնիշխանությանը: Այո, ՀՀ ինքնիշխանությունն անցնում է Վերին Լարսի անցակետով, և ցավոք, այն պարբերաբար ոտնահարվում է մի դեպքում՝ ռուս մաքսավորի լկտիության, մեկ այլ դեպքում՝ Ռուսաստանի բարձր ղեկավարության կայացրած քաղաքական որոշման պատճառով»:
Արման Բաբաջանյանի համոզմամբ՝ խնդիրը չի կարող լուծվել իրավիճակային քայլերով, անհրաժեշտ են խորքային, սկզբունքային, հայեցակարգային և ի վերջո՝ ռազմավարական լուծումներ, որոնք վերջ կդնեն այդ անցակետից Հայաստանի միագիծ կախվածությանը:
Պատգամավորն առաջարկեց լուծումներ. «ՀՀ-ն պետք է անհապաղ ստեղծի պետական կոնսորցիում Հայաստանից դուրս նավահանգստային ենթակառույց տերմինալ ձեռք բերելու համար: Այդ ճանապարհով, ի դեպ, գնացել են Ղազախստանը, որը ձեռք է բերել Բաթումի նավահանգիստը, և Ադրբեջանը, որը ձեռք է բերել Փոթիի նավահանգիստը: Սա մեր ցամաքային կապը դիվերսիֆիկացնելու միանգամայն տեսանելի հեռանկար է»:
Մանրամասները՝ տեսանյութում: