ԵԱՏՄ Բարձրագույն խորհրդի ընդլայնված կազմով նիստին ՀՀ վարչպետ Նիկոլ Փաշինյանը հայտարարել է, որ Հայաստանն առանձհատուկ կարևորում է Եվրասիական տնտեսական միության արտաքին տնտեսական հարաբերությունների աշխարհագրության ընդլայնումը։
«Այս ամիս ուժի մեջ են մտնում Իրանի և Չինաստանի հետ համաձայնագրերը: Դրանց հետագա իրականացումը մեզ համար առաջնային է երրորդ երկրների հետ առևտրային գործակցության իրական ընդլայնման համատեքստում:
Օգտվելով այն հանգամանքից, որ այստեղ ներկա է հարգելի պարոն Ռոհանին, ցանկանում եմ վստահություն հայտնել, որ ԵԱՏՄ-ի և Իրանի միջև ժամանակավոր համաձայնագիրը կծառայի որպես կատալիզատոր մեր փոխադարձ առևտրի հետագա զարգացման համար: Դա դրականորեն կազդի մեր երկրների տնտեսական վիճակի վրա՝ հավելյալ արժեքի նոր շղթաների լրացնման և ստեղծման հաշվին», – ասել է Փաշինյանը, ապա տեղեկացրել, որ Սինգապուրի հետ բանակցություններն ավարտվել են, ու այսօր կստորագրվի ԵԱՏՄ-ի, նրա անդամ երկրների և Սինգապուրի Հանրապետության միջև Ազատ առևտրի մասին համաձայնագիրը:
Նիկոլ Փաշինյանը տեղեկացրել է, որ Սերբիայի հետ բանակցությունները ևս ավարտվել են, և շուտով նախատեսվում է ստորագրել համապատասխան համաձայնագիր ազատ առևտրի մասին:
«Նպատակ ունենք արդյունավետ կերպով ավարտին հասցնել նաև Եգիպտոսի, Իսրայելի և Հնդկաստանի հետ բանակցությունները, ինչն առավելություններ կընձեռի մեր միավորմանը՝ դարձնելով այն նաև ներդրումների ներգրավման կենտրոն», – ասել է Փաշինյանը:
