Սեպտեմբերի 28-ին մի խումբ անձինք հետապնդել են Երևան քաղաքի առաջին ատյանի ընդհանուր իրավասության դատարանի դատավոր Աննա Դանիբեկյանին՝ անհարկի հարցուպատասխանի միջոցով փորձելով հոգեբանական ճնշման ենթարկել, վիրավորել և նսեմացնել դատավորի անձը: Կատարվածի վերաբերյալ դատավոր Դանիբեկյանն անմիջապես տեղյակ է պահել Բարձրագույն դատական խորհրդին և ոստիկանությանը:
Կատարվածին արձագանքել է նաև Մարդու իրավունքների պաշտպանը՝ տեղի ունեցածը համարելով անթույլատրելի։ Հիշեցնենք, որ դատավոր Աննա Դանիբեկյանը քննում է ՀՀ երկրորդ նախագահ Ռոբերտ Քոչարյանի և մյուսների գործը։
Հարցի շուրջ «Առաջին լրատվական»-ը զրուցել է Բարձրագույն դատական խորհրդի անդամ Գրիգոր Բեքմեզյանի հետ։
«Հիրավի, շատ տհաճ երևույթ տեղի ունեցավ։ Ընդ որում՝ անսպասելի, որովհետև ոչ մեկ չէր կարող պատկերացնել, որ նման բան կարող է լինել՝ նամանավանդ կին դատավորի հետ կապված։ ԲԴԽ-ն դատապարտել է այդ գործողությունները։ Բարեբախտաբար, բուն դատավորի համար դրանք շատ ծանր հետևանքներ չունեցան, ինչպես նաև իրավապահ մարմինները շատ արագ արձագանքեցին։ Իհարկե, ես հիմա չեմ որակավորի իրավապահ մարմինների կատարված գործողությունները՝ ժամանակը ցույց կտա, թե դրանք որքանով էին օրինաչափ։ Ամեն դեպքում՝ ԲԴԽ-ն գտնում է, որ դատավորի նկատմամբ եղել են ճնշման, նվաստացման փորձեր։ Կարելի է նաև մեկնաբանել, որ փորձ է կատարվել խոչընդոտել արդարադատության իրականացումը, քանի որ, եթե նայենք դեպքերի ընթացքն ու թե ով է իրականացրել այդ հարցերի շարադրումը, մենք կտեսնենք, որ կոնկրետ այն ուղղված էր Մարտի 1-ի գործը քննող դատավորին։ Այն հարցերը, որոնք տեսանյութի ընթացքում տրվում էին դատավորին, կապված էին դատավարության ընթացքում Քոչարյանի փաստաբանի կողմից տրված հարցերի հետ՝ կարծես թե դրա շարունակությունը լինեին»,- «Առաջին լրատվական»-ի հետ զրույցում ասաց Գրիգոր Բեքմեզյանը։
Մանրամասները՝ տեսանյութում։