Քրդական Firat լրատվական գործակալության փոխանցմամբ՝ Եվրոպայի խորհրդի մարդու իրավունքների գծով եվրահանձնակատար Թոմաս Համարբերգն այսօր հրապարակել է Թուրքիայում մարդու իրավունքների պաշտպանվածության մասին զեկույցը։
Դրանում Թուրքիան քննադատվել է խոսքի ազատության հարցում խոչընդոտներ հարուցելու հարցում. «Թեև վերջին տարիներին Թուրքիան զգայուն համարվող խնդիրների շուրջ բաց և ազատ քննարկումներ ծավալելու հարցում որոշակի առաջընթաց է գրանցել, դեռևս մտահոգիչ է մնում խոսքի ազատության ու ազատ մամուլի վիճակը։ Հրատապ միջոցներ են անհրաժեշտ այդ իրավունքների ու ազատությունների պաշտպանության, ինչպես նաև հանդուրժողականության մթնոլորտի ձևավորման համար»։
Զեկույցում Համարբերգը նշում է, որ խոսքի ազատության ու այլակարծության գլխավոր խոչընդոտը գործող Սահմանադրությունն է։ Թուրքիայի Քրեական օրենսգիրքը և Ահաբեկչության դեմ օրենքը նույնպես խոչընդոտներ են հարուցում խոսքի ազատության հարցում։
Զեկույցում Համարբերգը հիշատակել է նաև Ստամբուլի հայկական «Ակօս» թերթի նախկին խմբագրապետ Հրանտ Դինքի սպանությունը։