«Մեր իշխանությունները, ի տարբերություն ընդդիմության, լավ հաշվարկող են: Նրանք գիտեն իրենց ուժային, վարչական և այլ ռեսուրսների ամբողջությունը, նաև գիտեն մեր ժողովրդի կազմակերպվելու ունակությունը, և չեմ կարծում, թե վախեցել են հնարավոր դժգոհությունների ալիքից: Հատկապես հիմա, երբ խորը անհուսության է մատնված հանրությունը»,-անդրադառնալով վարչապետ Տիգրան Սարգսյանի հրաժարականին՝ «Առաջին լրատվական»-ի հետ զրույցում նման տեսակետ հայտնեց քաղաքական ուսումնասիրությունների «Վերելք» հիմնադրամի նախագահ, փորձագետ Արծրուն Պեպանյանը:
Նա ավելացրեց, որ վարչապետի հրաժարականը կապ չունի ընդդիմության հայտարարությունների հետ. «Այստեղ գուցե թե գլխավոր դեր ունեցել են արտաքին քաղաքական ազդակները: Դրանք շրջանառվում են համացանցում, և չեմ կրկնի: Կա մեկ գործոն ևս՝ ապագա ընտրություններին պատրաստվելը: Ներկա կառավարությունն իր վարչապետով վարկանիշային շատ բեռ ուներ իր վրա հավաքած, ու նրանով քաղաքական լուրջ գործընթացների մեջ մտնել չէր լինի»:
Պեպանյանն ընդգծեց, որ Սերժ Սարգսյանը վաղ թե ուշ հարկադրված էր լինելու փոխել կառավարության կազմը:
«Ապրիլի 28-ից հետո, երբ ընդդիմությունը հանդես գար վարչապետի հրաժարականի պահանջով, ապա ինքը հարկադրված էր լինելու չփոխել վարչապետին, որպեսզի ընդդիմությունը դա չվերագրեր նախագահի թուլությանը: Այնպես որ՝ հիմա իսկը վարչապետ փոխելու պահն էր այդ տեսանկյունից:
Հիմա մեկ այլ՝ քիչ հավանական վարկածի մասին: Երբեմն-երբեմն այսպիսի կարծիք է շրջանառվում, թե Սերժ Սարգսյանը ցանկանում է կադրային մեծ փոփոխություններ իրականացնել, բայց կա մտահոգություն, թե տուժած պաշտոնյաները կհամալրեն ներքին հակառակորդի շարքերը, ինչը ցանկալի չէ իր համար: Հիմա, եթե անգամ ճիշտ են նրանք, ովքեր վարչապետի հրաժարականը պայմանավորում են արտաքին քաղաքական գործոններով, ապա քանի որ արված է գլխավոր քայլը, Սերժ Սարգսյանի համար լավ հնարավորություն է փոփոխությունների տանել կառավարությունը ու երկրում իրականացնել օդ ու ջրի պես անհրաժեշտ բարեփոխումները: Թե՛ նրա վարկանիշը, թե՛ երկրի վիճակն ուղղակի կարիք են զգում դրական արմատական փոփոխությունների»:
Փորձագետը հավելեց, որ եթե դա հիմա չարվի, ապա հազիվ թե հետագայում Սարգսյանն անկումը կասեցնելու շանս ունենա:
