ՀՀ վարչապետ Տիգրան Սարգսյանի հրաժարականի դրդապատճառներն արտաքին ազդակները չեն: 168.am-ի հետ զրույցում նման տեսակետ է հայտնել ԱՄՆ-ում ՀՀ նախկին փոխդեսպան, ՀՀ ԱԳՆ Ռազմաքաղաքական վարչության նախկին պետ, վաշինգտոնաբնակ միջազգայնագետ Արմեն Խարազյանը՝ հավելելով, որ Միացյալ Նահանգներն ընդհանրապես չի զբաղվում Հայաստանում վարչապետներ փոխելով, դրա կարիքը չկա:
«Թերևս, ՀՀ-ում կարծիք կա, որ Ռուսաստանից են ազդակներ եղել: Չեմ կարող ասել, բայց ինձ մոտ երբեք այն տպավորությունը չի եղել, որ Տիգրան Սարգսյանն արևմտամետ ինչ-որ հակումներ է ունեցել՝ որպես վարչապետ: Նրա վարչապետության օրոք ՀՀ-ն շարունակել է ընթանալ նախագահի հաստատված քաղաքական կուրսով: Չեմ կարծում, որ Տիգրան Սարգսյանն ունեցել է առանձին ինչ-որ քաղաքական կուրս: Եվ Ռուսաստանի համար չեմ տեսնում, թե ինչ արժեք պետք է ներկայացնի ՀՀ վարչապետ փոխելը»,- ասել է Ա.Խարազյանը:
Ըստ նրա, խնդիրը ներքին է և բաղկացած է 3 բաղադրիչներից՝ իշխանական ներքին խմորումներ, իշխանության արձագանք, որոշ հայաստանյան զարգացումների և անձնական վարկանիշի անկում: Ա.Խարազյանի դիտարկմամբ՝ վարչապետի անձը վերջերս բավականին բաց էր տարբեր տեսակի քննադատությունների համար, հատկապես նրա օֆշորային գործարքների ու կոռուպցիոն խնդիրների հետ կապված, ինչը բերում է որոշ վարկաբեկման. «Առանց հեռու գնացող եզրակացությունների, թե նա իրո՞ք ներգրավված է այդ գործարքներում, պարզապես հանրային մակարդակով տեղի ունեցող քննարկումը և այդքան սպեցիֆիկ կոնտեքստներով արդեն օգտակար չէ որևէ քաղաքական գործչի համար»:
Կայքի հետ զրույցում Խարազյանը նկատել է, որ Հայաստանը միջազգային ասպարեզում որևէ կշիռ այսօր չունի, Մոլդովան, որ նույնիսկ լոբբիստական աշխատանք չի իրականացնում ԱՄՆ-ում, ավելի շատ աջակցություն է ստանում, քան Հայաստանը, որ լոբբիզմի վրա զգալի գումար ու ջանք է ծախսում. «Այստեղ Հայաստանին չեն էլ հիշում: Բայց Հայաստանին ԱՄՆ-ը կամ Արևմուտքը չեն հանձնել Ռուսաստանին, այլ Հայաստանն ինքն է իրեն հանձնել Ռուսաստանին»:
Մանրամասները՝ 168.am-ում
