Իրանը պահանջում է փոխհատուցել ամերիկյան պատժամիջոցներից կրած վնասը: Խոսքը 50 միլիարդ դոլարի չափով փոխհատուցման մասին է, գրում է ISNA գործակալությունը՝ հղում անելով երկրի նպատակահարմարությունների խորհրդի քարտուղար Մոհսեն Ռեզաիին: Իրանը նման պայմաններ է դնում ԱՄՆ-ի առաջ՝ միջուկային գործարքի իրականացմանը վերադառնալու դիմաց:
«Ամերիկացիները երազում են վերադառնալ Իրան,- ասել է Ռեզաին:- Ըստ ամերիկացիների, ներմուծման և արտահանման բոյկոտը պետք է խափաներ Իրանի առևտուրը և երկիրը դներ հարյուր տոկոսանոց շրջափակման մեջ: Ի սկզբանե մենք ասել ենք, որ այդ գործողություններն անպատասխան չեն մնա»:
Նա հիշեցրել է, որ ԱՄՆ իշխանությունները Իրանի դեմ պատժամիջոցներ են սահմանել տարեկան երկու անգամ: Վերջին սահմանափակումները ազդել են ազգային բանկի վրա:
Սպիտակ տանը Իրանի դեմ նոր պատժամիջոցներ կիրառելու մասին որոշումը կայացվել է Սաուդյան Արաբիայում նավթավերամշակման գործարանների վրա հարձակումից հետո: Ամերիկայում վստահ են, որ հարձակումն իրականացվել է ոչ թե Եմենի ապստամբների կողմից, այլ իրանցի զինվորականների: Իրանը հերքում է մեղադրանքները: