Սեպտեմբերի 27-ին համացանցում տեղեկատվություն էր տարածվել, որ Երևան քաղաքի առաջին ատյանի ընդհանուր իրավասության դատարանի դատավոր Աննա Դանիբեկյանը հետապնդվել և ենթարկվել է ճնշումների։ Փաստի առթիվ ընդունված հաղորդման հիման վրա ոստիկանության Շենգավիթի բաժնում քրեական գործ է հարուցվել ՀՀ քրեական օրենսգրքի 343-րդ հոդվածի (դատարանի նկատմամբ անհարգալից վերաբերմունք ցուցաբերելը) հատկանիշներով։ Ֆեյսբուքյան լայվի միջոցով դատավորին հետապնդած ու նրա նկատմամբ բարոյական ճնշում գործադրած անձը Ռոբերտ Քոչարյանի աջակից Նարեկ Մութաֆյանն է, որը ձերբակալվել է:
Աննա Դանիբեկյանը Ռոբերտ Քոչարյանի և մյուսների գործով դատավորն է, այն խիզախ կինը, որը՝ չնայած ճնշումներին, հրաժարվեց փոխել Ռոբերտ Քոչարյանի խափանման միջոցը ու առնվազն տարակուսելի է, որ այս պատասխանատու գործառույթն իր ուսերին վերցրած դատավորը գոնե մինչև երեկ չի եղել պետական պահպանության ներքո, անգամ՝ Հայկ Հարությունյանի սպանությունից կամ ինքնասպանությունից հետո, երբ գրեթե ողջ հասարակությունը կոնսոլիդացված տեսակետ արտահայտեց Ռոբերտ Քոչարյանի ձեռագրի վերաբերյալ, ավելի ստույգ՝ նախկին ոստիկանապետի սպանությունը կապելով երկրորդ նախագահի անվան հետ:
Անհասկանալի է, որ անգամ այս զազրելի հանցագործությունից հետո դատավոր Դանիբեկյանը եղել է միանգամայն անպաշտպան՝ թիրախավորվելով Քոչարյանի աջակիցների կողմից ու պարզ չէ, թե ինչքան կշարունակվեր նման վիճակը, եթե երեկվա միջադեպից հետո հանրային աղմուկ չբարձրացներ պատգամավոր Արման Բաբաջանյանը, որին, բարեբախտաբար, արագ արձագանքեց ոստիկանությունը՝ թիկնապահ տրամադրելով դատավորին:
Հուսանք, որ հուսալիորեն պաշտպանված կլինեն նաև Դանիբեկյանի ընտանիքի անդամները, Մարտի 1-ի գործով անցնող առանցքային վկաները, տուժողների իրավահաջորդների ներկայացուցիչ Սեդա Սաֆարյանը և այլք:
Իշխանության մյուս ճյուղերն, անշուշտ, չպետք է միջամտեն ընթացող դատավարությանը, սակայն պարտավոր են մենակ ու անպաշտպան չթողնել դատավորին, որն արդարադատություն իրականացնելիս ենթարկվում է երկրորդ նախագահի կողմնակիցների ամենաբիրտ ճնշումներին:
Առհասարակ, իշխանությունը պետք է զգոն լինի և թույլ չտա, որպեսզի Ռոբերտ Քոչարյանի թիմը՝ բռնությունների և ահաբեկչության ճանապարհով, երկրում առաջացնի քաոտիկ վիճակ՝ սերմանելով վախի և անվստահության մթնոլորտ:
Ամենախիստ ձևով պետք է պատժվեն մարդիկ, ովքեր մարտահրավեր են նետում արդարադատությանը, «հիբրիդային պատերազմին» բնորոշ շանտաժային լեզվով են խոսում օրինակարգ իշխանության հետ:
Որևէ կերպ չպետք է թույլատրվի վերադարձ արյունոտ տասնամյակին, երբ բոլոր հարցերը լուծվում էին կրակոցների միջոցով:
https://www.facebook.com/saqo.ohanjanyan.7/videos/1451913461638489/
