Ուժային կառույցներում կադրային փոփոխությունները և դրան հաջորդող քրեական գործերը շատ շատերին թույլ են տալիս մտածել, որ դրանք փոխշաղկապված են իրար հետ: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Արթուր Հովհաննիսյանը:
«Ես տեղեկացված չլինելով նման երևույթ կա, թե ոչ, բայց տրամաբանությունից ելնելով կարող եմ նման կարծիք հայտնել, հատկապես այն դեպքից հետո, երբ ԱԱԾ արդեն նախկին ղեկավարն իրեն թույլ տվեց անել արտահայտություններ, որոնք ընդհանրապես հարիր չեն ոչ ԱԱԾ ղեկավարին, ոչ ընդհանրապես սպային»,-ասաց նա:
Ինչ վերաբերում է քրեական գործերին, նաև այն, որ թե Վիգեն Սարգսյանը, թե Ալիկ Սարգսյանը հերքում են իրենց մասնակցությունը որևէ տեսակի կոռուպցիոն գործունեության, Արթուր Հովհաննիսյանն ասաց. «Բոլոր քրեական գործերով բոլոր մեղադրյալները նման հայտարարություններով հանդես են գալիս, ինչը բնական է: Երբեմն ինձ թվում է, որ այդ մարդիկ չեն պատկերացնում ինչ է կատարվել երկրում և դեռ ինչ է կատարվելու: Այնպիսի պարզ ու բարի տեքստերով են հանդես գալիս, կարծես թե նախորդ տարիներին երկրում ամեն ինչ նորմալ է եղել»:
Նա հավելեց, որ իշխանությունը պետք է ավելի կոշտ լիներ այդ մարդկանց նկատմամբ: