Հատուկ քննչական ծառայությունն օրերս տարածեց մի երկարաշունչ հաղորդագրություն, որը վերաբերում է 2008թ․ մարտի 1-2-ն ընկած ժամանակահատվածում Երևան քաղաքում սահմանադրական կարգի տապալմանն ուղղված գործողություններին։
«ՀՔԾ-ում քննվող քրեական գործի նախաքննության ընթացքում ձեռք բերված ապացույցների համակցության հիման վրա ՀՀ նախկին ոստիկանապետ Ալիկ Սարգսյանին մեղադրանք է առաջադրվել ՀՀ Քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիք)։ ՀՔԾ-ի հաղորդագրության մեջ նշվում են նաև ՀՀ նախագահի նախկին օգնական, ԱԺ ՀՀԿ-ական նախկին պատգամավոր Գևորգ Կոստանյանի, ոստիկանության քրեական հետախուզության գլխավոր վարչության նախկին պետ Հայկ Միլիտոնյանի, նրա տեղակալ Հովհաննես Թամամյանի, ոստիկանության պետի նախկին տեղակալ Ալեքսանդր Աֆյանի, ոստիկանության Երևան քաղաքի վարչության պետ Ներսես Նազարյանի, նաև վաղամեռիկ, ոստիկանության պետի տեղակալ Գևորգ Մհերյանի և օրերս ինքնասպանություն գործած ՀՀ նախկին ոստիկանապետ Հայկ Հարությունյանի անունները։
ՀՔԾ մամուլի խոսնակ Մարինա Օհանջանյանից հետաքրքրվեցինք, թե չկա՞ մտավախություն, որ Գևորգ Կոստանյանը, Հայկ Միլիտոնյանը, Հովհաննես Թամամյանը, Ալեքսանդր Աֆյանը, Ներսես Նազարյանը կարող են խուսափել քննությունից և մեկնել արտերկիր։ Ի՞նչ միջոցներ են ձեռնարկվում այդ ուղղությամբ։
Մարինա Օհանջանյանն ասաց, որ ՀՔԾ-ն դեռևս նշված անձանց մասով չի հստակեցրել կարգավիճակը, իսկ Գևորգ Կոստանյանը գտնվում է արտերկրում և խոստացել է վերադառնալ 15-20 օրից։
