Ինքնասպանությունների թվաքանակն ԱՄՆ-ի զինված ուժերի գործող զորամասերում 2018 թվականին հասել Է ռեկորդային մակարդակի. իրենց կյանքին վերջ են տվել 325 զինծառայողներ: Այդ մասին Պենտագոնը հայտնել Է սեպտեմբերի 26-ին հրապարակված զեկույցում, որում վերապահում Է արվում, որ համապատասխան վիճակագրությունը վարում են 2001 թվականից: Ինչպես նշել են պաշտպանության նախարարության ներկայացուցիչները, բանակում (ԱՄՆ-ում այդպես են անվանում ցամաքային զորքերը) իրենց կյանքին վերջ են տվել 139, ռազմածովային ուժերում՝ 68, ռազմաօդային ուժերում՝ 60 եւ ծովային հետեւակի զորակազմում՝ 58 մարդ: Պենտագոնի տվյալների համաձայն, անցյալ տարի զինվորական ծառայության մեջ Է եղել 1,35 մլն զինվոր, նավաստի, օդաչու եւ ծովային հետեւակային: Համեմատության համար նշենք, որ 2017 թվականին ինքնասպանություն Է կատարել 285 զինծառայող, 2016 թվականին՝ 280, 2012 թվականին՝ 319, 2009 թվականին՝ 310: Բացի այդ, անցյալ տարի ինքնասպանություն Է գործել 135 ազգային գվարդական եւ 81 պահեստազորային: Միագումար ստացվում Է 541 մարդ, ինչն զգալիորեն գերազանցում Է ամերիկացի այն զինծառայողների թիվը, որոնք ամեն տարի զոհվում են Աֆղանստանում, Իրաքում, Սիրիայում եւ այլ երկրներում տեղի ունեցող մարտական գործողությունների գոտիներում: Այսպես, Պենտագոնի կորուստները 2017 թվականին կազմել են 31, 2016 թվականին՝ 26 մարդ, հաղորդել Է ՏԱՍՍ-ը: