ԱՄՆ նախագահ Դոնալդ Թրամփը հայտարարել է, որ իրեն ավելի վատ են վերաբերվում, քան Միացյալ Նահանգների բոլոր նախորդ նախագահներին։
«Մեր երկրի պատմության մեջ չի եղել և ոչ մի նախագահ, որին այդքան վատ վերաբերվեին, որքան ինձ: Դեմոկրատները ներծծված են ատելությամբ ու վախով: Նրանք ոչինչ չեն անում: Չի կարելի թույլ տալ, որ երբևիցե նման բան տեղի ունենա մեկ այլ նախագահի հետ:
Վհուկների որս է»,- գրել է Թրամփը Twitter-ում։ ԱՄՆ Ներկայացուցիչների պալատի խոսնակ Նենսի Փելոսին սեպտեմբերի 25-ին հայտարարել է ընթացակարգ սկսելու որոշման մասին, որի նպատակն է որոշել, թե կան արդյոք հիմքեր երկրի նախագահ Դոնալդ Թրամփին պաշտոնազրկում հայտարարելու համար: «Նախագահը պետք է պատասխան տա իր գործողությունների համար: Ոչ ոք վեր չի կանգնած օրենքից»,- հավելել է նա:
Ավելի վաղ Թրամփը հայտարարել է, որ դեմոկրատների այդ քայլը, որոնք մեծամասնություն են կազմում Ներկայացուցիչների պալատում, վտանգ չի ներկայացնում իր համար և միայն կօգնի 2020 թվականին հասնելու երկրորդ ժամկետով վերընտրման: Սեպտեմբերի 25-ին նա նաև նշել է, որ դեմոկրատները հատուկ հենց այդ օրն են ընտրել հայտարարելու իրենց որոշման մասին՝ ձգտելով շեղել ուշադրությունն իր հաջողություններից ՄԱԿ-ի Գլխավոր ասամբլեայում:
