Ամբողջ աշխարհում բանկերը 2019 թվականին հայտարարել են շուրջ 60 հազար աշխատակիցների կրճատման մասին, ընդ որում գրեթե բոլոր ազատումները բաժին են ընկնում Եվրոպային։
Դա պայմանավորված է բացասական տոկոսադրույքներով և տնտեսության աճի տեմպերի դանդաղացումով, ինչը ֆինանսական կազմակերպություններին դրդում է ծախսերի կրճատման՝ տեղեկացնում է Bloomberg գործակալությունը։
Մասնավորապես, անցյալ շաբաթ Գերմանիայի Commerzbank-ը հրապարակել է 4,3 հազար աշխատատեղի լուծարման մասին՝ խորացնելով երեք տարի առաջ սկսված վերակառուցավորումը: Դրա հետևանքով հայտարարված կրճատումների թիվը հասել է 58,2 հազարի, և գրեթե 90 տոկոսը (ավելի քան 52,4 հազար) բաժին է ընկնում Եվրոպայի բանկերին:
Ասիախաղաղօվկիանոսյան տարածաշրջանում ցուցանիշը կազմում է 500-ից փոքր-ինչ ավելի, Հյուսիսային Ամերիկայում՝ 2,77 հազար, Մերձավոր Արևելքում և Աֆրիկայում՝ 2,5 հազարից պակաս: Արձակումների տեմպերով առաջատարների թվում են Գերմանիայի բանկերը, որի տնտեսությունը զգալի չափով կախված է արտահանումից: Այսպես, Գերմանիայում ճյուղի խոշորագույն ներկայացուցիչ Deutsche Bank-ը մտադիր է մինչև 2022 թվականի վերջը հեռացնել 18 հազար աշխատակիցների:
Իսպանիայի Santander-ը հայտարարել է ավելի քան 5,4 հազար աշխատատեղ կրճատելու մասին, Մեծ Բրիտանիայի HSBC-ն և Barclays-ը՝ համապատասխանաբար 4 հազար և 3 հազար, Ռուսաստանի Ալֆա-բանկը՝ 3 հազար աշխատատեղերի կրճատման մասին։