Ավստրիական «Ռեդ Բուլ» ընկերությունը հայտարարել է, որ համաձայն իրենց վերջին հաշվարկներին՝ վերջին 10 տարում ընկերության ներդրումները «Ֆորմուլա 1»-ի թիմում կազմել է շուրջ 1.2 միլիարդ դոլար: Այս մասին հաղորդում է Forbes-ը:
Այն ժամանակվանից, երբ «Ռեբ Բուլ» ընկերությունը գնեց «Յագուար» թիմը, նրանք իրենց անձնակազմի թիվը ավելացրին մինչև 300-ի, իսկ 2012 թվականին հասցրին մինչև 658-ի: Թիմ հրավիրված ամենակարևոր մարդկանցից մեկը համարվում է Քրիստիան Հորները, ով 32 տարեկան հասակում դարձավ «Ֆորմուլա 1»-ի թիմի ամենաերիտասարդ ղեկավարը: Հորները թիմ հրավիրեց Ադրիան Նյուիին՝ «արքայական ավտոարշավ»-ի ամենահաջողակ բոլիդներից մեկի հեղինակին: Եվ վերջապես, 2009 թվականին թիմ հրավրիվեց ներկայումս աշխարհի քառակի չեմպիոն Սեբաստիան Ֆետելին:
«Ռեդ Բուլ» ընկերությունը շատ լուրջ միջոցներ է ներդրել «Ֆորմուլա 1»-ի թիմում՝ հաջողության հասնելու համար: 1.2 միլիարդի ներդրումը սկսվել է 2005 թվականին 100 միլիոն դոլարի ներդրումից, իսկ արդեն 2012 թվականին տարեկան ներդրումները կազմում էին 159.4 միլիոն դոլարի: Տարեկան ներդրումների ամենամեծ չափը գրանցվել է 2009 թվականին, և գումարը կազմել է 170 միլիոն դոլար:
«Ռեդ Բուլ» ընկերության շահույթը ակնհայտ է: Ներկայումս ավստրիական ընկերության բրենդը «Ֆորմուլա 1»-ում համարվում է ամենաճանաչվածը: Գովազդային էկվիվալենտի արժեքը «Ռեդ Բուլ» ընկերության մոտ կազմում է 1.6 միլիարդ դոլար, ինչը գերազանցում է ընկերության կողմից ներդրված 1.2 միլիարդ դոլարը: