Իսպանացի վիրաբույժները բժշկության պատմության մեջ առաջին անգամ կատարել են ոտքերի փոխպատվաստում: Վիրահատությունը տևել է 10 ժամ, իրականացվել է Վալենսիայի Լա Ֆե հիվանդանոցում: Այս մասին հաղորդում է El Mundo-ն:
Բժիշկների խումբը ղեկավարել է հայտնի իսպանացի բժիշկ Պեդրո Կավադասը: Նա իրականացրել է մի շարք այլ բացառիկ վիրահատություններ, որոնցից է դեմքի, այդ թվում՝ ծնոտի ներքևի մասի փոխպատվաստումը: Այս վիրահատության նախապատրաստական աշխատանքը բավական երկար է տևել: Նման վիրահատության համար արգելքներ չկան, սակայն շատերը կարծում են, որ այս դեպքում ավելի նպատակահարմար է ոտքերի որակյալ պրոթեզ սարքել:
Հիվանդը զրկվել էր ոտքերից, և նրան հնարավոր չի եղել ապահովել պրոթեզներով: Բժիշկն ասել է, որ վիրահատությունը հաջող է ընթացել, ոչ մի լուրջ խնդիր չի առաջացել: Նշվում է, որ վերականգնողական փուլը բավական երկար կտևի:
