Հայաստանի Հանրապետությունը միջազգային շուկայում հաջողությամբ տեղաբաշխեց եվրոպարտատոմսերի երրորդ թողարկումը՝ 500 մլն ԱՄՆ դոլար ծավալով և 10 տարի մարման ժամկետով, միաժամանակ, գրեթե ամբողջությամբ հետ գնելով հաջորդ տարի մարվող պարտատոմսերը։ Նոր թողարկման պարտատոմսերի արժեկտրոնի եկամտաբերությունը 3,95 % է հետ գնված պարտատոմսերի 6 %-ի փոխարեն, ինչը թույլ կտա նվազեցնել պարտքի սպասարկման ծախսերը։
Նշվում է նաև, որ պահանջարկը գրեթե 5 անգամ գերազանցել է թողարկման ծավալը, իսկ պարտատոմսերի վերջնական եկամտաբերությունը կազմել է տարեկան 4,2 %: Այս ամենը, առհասարակ, ի՞նչ ազդեցություն կունենա․ «Առաջին լրատվական»-ի հարցին Տնտեսագիտական համալսարանի Ինովացիոն և ինստիտուցիոնալ հետազոտությունների լաբորատորիայի ղեկավար Ատոմ Մարգարյանը պատասխանեց․ «Ի սկզբանե ասեմ, որ պետական պարտքի և բյուջեի վրա դրական ազդեցություն կունենա։ Շատերի համար գուցե սա անակնկալ է, որովհետև մտահոգություններ, կասկածներ կային, որ, այնուամենայնիվ, Հայաստանը դժվարություններ կունենա վերաթողարկել եվրոբոնդերի նոր խմբաքանակ և, ըստ էության, Հայաստանը արդեն կարող է դժվարություններ ունենալ 2020 թվականի բյուջեի կատարման և, ընդհանրապես, պետական պարտքի՝ հատկապես արտաքին պարտքի մասով։
Բայց փաստորեն նման բան չկա և այս վերջին զարգացումները ոչ միայն Նիկոլ Փաշինյանի կաբինետի, այլ նաև նախորդ երկու տարիներին Կարեն Կարապետյանի, այսպես կոչված, ջանքերը հանգեցրել են բյուջետային հավասարակշռության բարենպաստ կետի։ Ընդհանրապես, վերջին մեկ տարվա ընթացքում այս արժեթղթերի գրավչության անկում չի եղել։ Ստացվում է, որ կառավարությունը կարողացել է ավելի գրավիչ պայմաններով տեղաբաշխել եվրոբոնդերը, որը խոսում է ներդրումային գրավչության մեծացման մասին։ Ի վերջո չմոռանանք, որ մասնավոր ներդրողները նայում են այդ շուկաներին»։
Մանրամասները՝ տեսանյութում։
