Նախկին ոստիկանապետ, մարտիմեկյան գործի առանցքային վկա Հայկ Հարությունյանի սպանությունը կամ ինքնասպանությունը՝ նախնական վարկածը երկրորդն է, հանրության շրջանում բնականորեն առաջացրել է քննարկվող վարկածների շուրջ ամենատարբեր հարցադրումներ և դիտարկումներ: Այդ հանգամանքի կապակցությամբ մեկնաբանությունը թերևս ավելորդ է:
Միաժամանակ անկասկած է, որ Հայկ Հարությունյանի մահը ընդհանուր առմամբ կարող է ունենալ «յուղի էֆեկտ» այն ներքաղաքական «կրակի վրա», որ վերջին օրերին բռնկվել է ԱԱԾ պետի և ոստիկանության պետի պաշտոնանկության մասին վարչապետի որոշումների ֆոնին, և այդ առիթով էլ բռնկված վարչապետ-ԱԱԾ նախկին ղեկավար դիմակայության կամ առնվազն հեռակա սուր բանավեճի ֆոնին: Այդ իրավիճակում Հարությունյանի մահը գործնականում առիթ է այն, այսպես ասած, տեղեկատվաքարոզչական ալիքի համար, որ վերջին օրերի բուռն զարգացումների և թեժ բանավեճի ֆոնին ծավալվում է՝ այն մտայնությունն ունենալով առանցքում, որ վարչապետ Փաշինյանն ու կառավարող ուժը չեն տիրապետում իրավիճակին, և Հայաստանում մեծ հաշվով անկառավարելի իրադրություն է:
Իհարկե, մեղմ ասած, անհնար է այդպիսի հիմքով գալ Հայկ Հարությունյանի մահվան հանգամանքների կամ անգամ շահառուների շրջանակի շուրջ եզրակացության, քանի որ այդօրինակ հնչեղ հանցագործությունները կամ մահերը, մեղմ ասած, մեկ շահառու չէ, որ ունենում են, և մեկ սուբյեկտ չէ, որ կփորձի օգտվել այդ հանգամանքից՝ հրապարակավ կամ կուլիսներում:
Խնդիրը, սակայն, այն է, որ տեղի ունեցածը ինքնաբերաբար անգամ ավելանալու է «անկառավարելիության» մասին ալիքին: Դրա նպատակի մասին խոսել ենք՝ նպատակը հանրության վրա հոգեբանական ազդեցությունն է և այդպիսով իշխանության, մասնավորապես վարչապետ Փաշինյանի նկատմամբ անվստահության ձևավորումը: Այստեղ կա բավականին նուրբ շերտավորում:
Խնդիրն այն է, որ հանրությունը կհիասթափվի կամ կսկսի չվստահել Փաշինյանին: Նրան կշարունակեն համարել անկաշառ, պայքարող, անկեղծ, սակայն կսկսեն կասկածել, թե նա ունակ է կառավարել պետությունը: Ահա այդ կասկածը խորացնելու ուղղությամբ է աշխատում ալիքը, և հատկանշական է, որ այն մեծ թափ ստացավ Փաշինյանի՝ ԱՄՆ այցից առաջ, որը մի շարք առումներով նշանակալի հանգրվան կարող էր լինել հետհեղափոխական նոր փուլին ընդառաջ, որի խորհրդանշական մեկնակետ էր նաև ուժային բլոկում ղեկավարների փոփոխությունը:
Ահա այդ իրավիճակին էլ «գումարվում» է նախկին ոստիկանապետի, մարտիմեկյան գործով առանցքային վկայի մահվան հանգամանքը, երբ վարչապետը Նահանգներում է, և նրա այցի օրակարգում է Հայաստանի հետ տնտեսաքաղաքական գործընկերության նոր շրջանակների ուրվագծումը:
