Մամուլը պարբերաբար գրում է, որ Ռուսաստանն օրակարգում է պահում գազի սակագնի բարձրացման հարցը, այն էլ 30 %-ի չափով։ Հայաստանի վարչապետի խոսնակը նշել էր, որ բանակցություններ են ընթանում, և արդյունքը պարզ կլինի դրանց ավարտից հետո։
Որքանո՞վ է հավանական գազի գնի բարձրացումը, և հենց 30 %-ի չափով․ «Առաջին լրատվական»-ի հարցին «Մեկ Հայաստան» կուսակցության համահիմնադիր, էներգետիկ անվտանգության փորձագետ Վահե Դավթյանը պատասխանեց․ «Իրականում գազի գինն այն հարցն է, որն իր մեջ պարունակում է քաղաքական, ինչպես նաև սոցիալական դրույթ։ Պատահական չէ, որ իշխանությունները վերջին շրջանում հնարավորինս փորձում են խուսափել գազի գնի բարձրացման թեմայից, որովհետև Մոսկվայից կան հստակ ազդակներ, որ 2020 թվականի հունվարի 1-ից, այնուամենայնիվ, Հայաստանի համար գազի գինը բարձրանալու է։ Ճիշտ է, այս խոսակցությունները շրջանառվում են լրատվամիջոցներում, փորձագիտական մակարդակում, բայց համաձայն իմ ռուսական որոշ աղբյուրների, որոնք բավականին մոտ են կանգնած «Գազպրոմին» և, առհասարակ, տեղյակ են այդ բանակցային գործընթացից, «Գազպրոմի» կողմից այս ամսվա սկզբին առաջարկվել է գազի գինը Հայաստանի համար բարձրացնել շուրջ 40 դոլարով։ Այսինքն՝ խոսքը գնում է 1000 մ3-ի համար 200-205 դոլար, ինչը, կարծում եմ՝ լուրջ և բացասական ազդեցություն կունենա ոչ միայն էներգետիկ անվտանգության համակարգի, այլ, առհասարակ, տնտեսական համակարգի վրա։
Ակնհայտ է, որ գազի գնի բարձրացումն ուղղակիորեն անդրադառնալու է էլեկտրաէներգիայի գնի բարձրացման վրա՝ հաշվի առնելով այն հանգամանքը, որ երկրում գեներացվող էլեկտրաէներգիայի շուրջ 40 %-ը ապահովում են բնական գազով աշխատող ջերմաէլեկտրակայանները»։
Մանրամասները՝ տեսանյութում։