Վարչապետ Նիկոլ Փաշինյանը Լոս Անջելեսում լրագրողների հետ զրույցում անդրադարձել է ՀՀ ԱԱԾ նախկին տնօրեն Արթուր Վանեցյանի հրաժարականի տեքստին՝ տալով խիստ գնահատականներ։ Սրան հաջորդել է ԱԱԾ նախկին պետի պատասխանը. իր հասցեին հնչեցրած քննադատությանը Ա. Վանեցյանի պատասխանը եղել է ոչ պակաս կոշտ: Նա զգուշացրել է, որ իր հասցեին խոսակցությունը շարունակվելու դեպքում ինքն էլ չի լռի: ԱԱԾ պետի պաշտոնանկության շուրջ այս նոր զարգացումը հիմք է տալիս ենթադրելու, որ Հայաստանում վերջին օրերին կատարված փոփոխություններն ավելի խորքային բնույթ ունեն:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, քաղաքագետներ Ռուբեն Մեհրաբյանը և Էդգար Վարդանյանը:
Ստեղծված իրավիճակը, Հակոբ Բադալյանի գնահատմամբ, հետհեղափոխական շրջանին բնորոշ է և ներառում է քաղաքական այն ձևաչափի փնտրտուքը, որն ի վերջո պետք է լինի Հայաստանում: «Իսկապես կան բարդություններ, որովհետև ունենք թե՛ քաղաքական իշխանության ձևավորման խնդիր, քանի որ դեռևս գործ ունենք հեղափոխական իշխանության հետ, թե՛ քաղաքական ընդդիմության ձևավորման խնդիր. այս դաշտն իրենով է արել նախկին իշխանությունը: Կոնֆլիկտային այս իրավիճակներն արդյո՞ք կբերեն քաղաքական նոր ձևաչափերի, թե ոչ, ժամանակը ցույց կտա»,- նշեց վերլուծաբանը:
Հարցին, թե արդյոք պարզ քաղաքական փոխհրաձգություն է տեղի ուենում վարչապետի և ԱԱԾ նախկին պետի միջև, Էդգար Վարդանյանը պատասխանեց. «Նախ պետք է պարզել՝ արդյոք Վանեցյանը ուզում է քաղաքական գործիչ լինել, և որն է դրա դրդապատճառը: Ակնհայտ է, որ Վանեցյանն ակնարկել է, որ ասելիք ունի, բայց այդ մասին կխոսի, երբ որ, իր բնորոշմամբ՝ իր մասին միֆերը կշարունակվեն: Հարց է ծագում, եթե սա ազգային անվտանգության հարց է, ի՞նչ կապ ունի, թե երբ կհրապարակես, պետք է երբեք չհրապարակես այդ տեղեկատվությունը, անկախ ամեն ինչից, իսկ եթե ազգային անվտանգությանը դա չի առնչվում, և եթե անձը մտահոգ է Հայաստանի զարգացմամբ և ցանկություն ունի նպաստելու երկրի ամրացմանը և ժողովրդավարության զարգացմանը, ապա անհապաղ պետք է տեղեկացնել հանրությանը, թե ինչ է կատարվում: Բայց տեսնում ենք, որ դա չի արվում, ինչը հիմք է տալիս այս հարցի վերաբերյալ անորոշությանը: Այն, որ ինֆորմացիոն դաշտ է ներմուծվել քաղաքական տեքստ ոչ քաղաքական՝ այն էլ այդպիսի պաշտոն զբաղեցնող մարդու կողմից, դա արդեն իսկ հիմք է տալիս մտածելու, որ այստեղ կա հստակության պակաս առ այն, թե արդյոք ազնիվ են արված հայտարարությունները»:
Արդյո՞ք քաղաքական տողատակ է պարունակում, թե միայն անձին է ուղղված Վանեցյանի այս արտահայտությունը. «Պատկերացնո՞ւմ եք, եթե հանկարծ ես սկսեմ խոսել առանց հետևանքների մասին մտածելու»: Ռուբեն Մեհրաբյանի կարծիքով՝ երկու հարթությունն էլ ներառված են՝ և՛ անձնական, և՛ քաղաքական: «Ընտրված քաղաքական ուժի ղեկավարի հետ, որը Հայաստանի վարչապետն է, ոչ ոք իրավունք չունի խոսել սպառնալիքի լեզվով: Վարչապետը պարտավոր է այդ ամենը կասեցնել, որովհետև սա սպառնալիք է բոլոր նրանց համար, ովքեր քվեարկել են վարչապետ Փաշինյանի ղեկավարած քաղաքական ուժի օգտին, բոլոր նրանց համար, ովքեր համակրել և շարունակում են հեղափոխությանը համակրել»,- ընդգծեց քաղաքագետը:
Մանրամասն՝ տեսանյութում:
