Ժամեր առաջ Լոս Անջելեսի «Գրանդ Փարք»-ում ավարտվեց վարչապետ Նիկոլ Փաշինյանի հանդիպումը տեղի հայ համայնքի հետ: Նիկոլ Փաշինյանը թերևս առաջին անգամ ձևակերպեց Սփյուռքի նոր առաքելությունը՝ վերջինս համարելով համահայկական զարգացման նախագիծ։ Ելույթի առանցքային կետերից մեկն էլ այն էր, որ համազգային պոտենցիալը պետք է կենտրոնանա ոչ թե պատմական արդարության վերականգնման, այլ հայկական պետականությունը հզորացնելու շուրջ։ Այս և արտաքին քաղաքական մի շարք հարցեր «Առաջին լրատվական»-ը քննարկել է քաղաքագետ Սուրեն Սարգսյանի և միջազգայնագետ Լիանա Հովհաննիսյանի հետ:
«Շատ ճիշտ գաղափար է ընդհանրապես առաջնահերթությունների վերադասավորումը ամբողջ Սփյուռքի համար, մանավանդ, երբ որ այդ հայտարարություններն արվում են ԱՄՆ-ում, մանավանդ ամենամեծ սփյուռքի օջախում՝ Լոս Անջելեսում: Եթե թարգմանենք վարչապետի խոսքը, նշանակում է, որ ժամանակն է, որպեսզի ոչ թե առաջնահերթությունը լինի բացառապես Ցեղասպանության ճանաչումը, և մեր բոլոր ջանքերը միտված լինեն ԱՄՆ-ում Ցեղասպանության ճանաչմանը, որն այսօր քիչ հավանական եմ համարում, այլ պետք է կենտրոնանալ Հայաստանի և Արցախի հզորացման, Հայաստանի և Արցախի անվտանգության վրա. այսօր սա մեր ամենակարևոր մարտահրավերն է, որ ունի հայ ժողովուրդը: Այս առումով իհարկե շեշտադրումը չափազանց կարևոր է»:
Սարգսյանը ցավով արձանագրեց, որ միջոցառմանը հանրապետական ոչ մի կոնգրեսական չէր մասնակցում, չնայած Կալիֆոռնիայից 7 հանրապետական կոնգրեսական կա: «Բայց ոչինչ, սա էլ ենք դնում մի կողմ, հիմա Կալիֆոռնիայի հայ համայնքի ձայներն ավելի անհրաժեշտ են դեմոկրատներին, քան հանրապետականներին, Թրամփին հայերի ձայներն ընդհանրապես պետք չեն»:
Լիանա Հովհաննիսյանն իր հերթին ասաց, որ և՛ լոբբիստական կազմակերպությունները, և՛ Համահայկական կուսակցությունը մեծ ներդրում են ունեցել հավաքի կայացման գործում. «Կարևոր է շեշտել, որ նրանք միահամուռ աշխատել են՝ անկախ քաղաքական հայացքներից, արդյունքում կարողացել են նպաստել միջոցառման կայացմանը»:
Մանրամասն՝ տեսանյութում: