Սեպտեմբերի 18-ին Վայոց ձորի Եղեգնաձոր քաղաքում տեղի ունեցած միջադեպի արդյունքում հիվանդանոցում հայտնված փոխգնդապետ Արա Մխիթարյանի ընկերները այսօր բողոքի ակցիա էին իրականացնում կառավարության դիմաց։ Նրանք պահանջում էին արդարացի քննություն իրականացնել և պատժել բոլոր մեղավորներին։ Ակցիայի մասնակիցները պահանջում էին, որ գործի քննությունը Վայոց ձորից տեղափոխվի Երևան և քննվի անձամբ գլխավոր դատախազի հսկողությամբ։
Հիշեցնենք, որ սեպտեմբերի 18-ին Վայոց ձորի Եղեգնաձոր քաղաքում աղմկահարույց միջադեպ էր տեղի ունեցել, որին մասնակցություն էր ունեցել Վայոց ձորի մարզպետի օգնական Հարություն Գրիգորյանը: Դեպքը տեղի է ունեցել ժամը 00:00-ի սահմաններում. միջադեպից տուժածը ՀՀ ՊՆ փոխգնդապետ Արա Մխիթարյանն է, որն այնպես է ծեծի ենթարկվել, որ տեղափոխվել է ՀՀ ՊՆ Կենտրոնական կլինիկական հոսպիտալի վերակենդանացման բաժանմունք:
Ծեծված փոխգնդապետի ընկերները պնդում են, որ մարզպետը ևս մասնակից է եղել միջադեպին, իսկ մարզպետը հերքում է իր մասնակցությունը։
Ի դեպ, այսօր Քննչական կոմիտեն, հաշվի առնելով հանրության հետաքրքրությունը, հաղորդագրությամբ տեղեկացրել է, որ Վայոց ձորի մարզային քննչական վարչությունում քննվող քրեական գործի շրջանակներում ձեռնարկվում են անհետաձգելի քննչական գործողություններ՝ մարզում տեղի ունեցած միջադեպին Վայոց ձորի մարզպետի մասնակցությունը ստուգելու ուղղությամբ:
Ինչպես հայտնում են ՔԿ-ի մամուլի ծառայությունից, այս պահին առգրավվել են դեպքի հարակից տարածքում առկա տեսախցիկները՝ մարզպետի մասնակցությունը միջադեպին ստուգելու նպատակով: Գործը գտնվում է ՀՀ Քննչական կոմիտեի նախագահ Հայկ Գրիգորյանի հսկողության ներքո։
Կառավարության դիմաց հավաքված ակցիայի մասնակիցները պահանջում էին մարզպետ Տրդատ Սարգսյանի լիազորությունների դադարեցում մինչև քննության ավարտը։
«Աստված չանի՝ Արա Մխիթարյանը մահանա։ Դրանից հետո չգիտեմ՝ ինչ կարող է լինել։ Դրանից հետո էդ միջադեպի մասնակիցները լավ կանեն անցնեն Նախիջևանի կողմը։ Միայն դա իրենց կփրկի»,- ասաց ակցիայի մասնակիցներից մեկը։