Սեպտեմբերի 17-ին Երևանի ընդհանուր իրավասության դատարանը մերժել էր Քոչարյանի պաշտպանների միջնորդությունը՝ անհապաղ վերացնել նախագահի խափանման միջոց կալանքը և դադարեցնել նրա նկատմամբ քրեական հետապնդումը։ Իսկ այսօր Երևանի ընդհանուր իրավասության դատարանը մերժեց ՀՀ երկրորդ նախագահ Ռոբերտ Քոչարյանի պաշտպանական թիմի միջնորդությունները՝ կալանքի փոխարեն որպես խափանման միջոց ընտրել գրավը կամ ազատազրկման հետ կապ չունեցող այլ խափանման միջոց: Գրավի չափը թողել էին դատարանի հայեցողությանը:
Դատական նիստի ընթացքում պաշտպանական կողմը ինքնաբացարկի միջնորդություն ներկայացրեց գործը քննող դատավոր Աննա Դանիբեկյանին։ Դուք այս պահին այդ ինքնաբացարկի հիմքը տեսնո՞ւմ եք, թե՞ ոչ․ «Առաջին լրատվական»-ի հարցին փաստաբան, Փաստահավաք խմբի նախկին անդամ Սեդա Սաֆարյանը պատասխանեց․ «Ես կարծում եմ՝ այս պահին Աննա Դանիբեկյանն այնպիսի գործողություններ չի ձեռնարկել, որ նրան ինքնաբացարկելու հիմք լինի։ Զուտ օրենքի դաշտում նա մերժել է պաշտպանական կողմի երկու միջնորդությունները։ Սահմանադրական դատարանի կողմից կայացված սեպտեմբերի 4-ի որոշմամբ երբևէ չի խոսվել Ռոբերտ Քոչարյանին ազատ արձակելու հիմնավորումների մասին․ որոշման մեջ այդպիսի պատճառաբանություններ ու հիմնավորումներ չեն եղել։ Այստեղ մենք գործ ունենք իր պաշտոնավարման տարիներին իր գործառույթներից չբխող արարքների համար Քրեական օրենսգրքով նախատեսված արարքի մեջ մեղադրվող Հայաստանի երկրորդ նախագահի պատասխանատվության հարցի հետ։ Այսինքն՝ գործի փաստական հանգամանքները չեն համապատասխանում Սահմանադրական դատարանի որոշմամբ արձանագրված գործի փաստական հանգամանքներին։ Այս առումով խիստ տարբեր է։ Հետևապես, առաջին միջնորդությունն ակնհայտ անհիմն էր։ Իսկ երկրորդ միջնորդության հետ կապված՝ դատախազությունը մանրամասնորեն ներկայացրեց գործից փաստեր, որոնց բարձրաձայնումը պաշտպանական կողմի համար կարևոր չէր, որովհետև նրանք գտնում են, որ դրանք Ռոբերտ Քոչարյանի հետ որևէ կապ չունեն։ Այս ամենը տարավ նրան, որ խափանման միջոցը թողնվեց անփոփոխ»։
Մանրամասները՝ տեսանյութում։