Շվեյցարական Ալպերում հոգեհանգստի արարողություն է տեղի ունեցել, որը նպատակ է ունեցել ուշադրություն գրավել Պիցոլ սառցադաշտի անհետացման վրա, հաղորդում է «Բի-բի-սի» գործակալությունը:
Սգո քայլերթին մասնակցել են սգավոր շորերով տասնյակ մարդիկ՝ ինչպես տեղաբնակներ, այնպես էլ զբոսաշրջիկներ: Նրանք բարձրացել են 2700 մետր բարձրության վրա, որպեսզի հարգանքի տուրք մատուցեն սառցադաշտի մնացորդներին:
Հասնելով սառցադաշտին՝ հոգևորականն ու գիտնականները սգո ճառեր են ասել, իսկ ի հիշատակ սառցադաշտի՝ ծաղկեպսակներ են դրվել:
Կլիմայի պահպանման տեղական ասոցիացիայի անդամ Ալեսանդրա Դեգիակոմին պատմել է, որ 2006 թվականից ի վեր Պիցոլը կորցրել է իր սառույցների 80%-ը:
Շվեյցարացի գիտնականների հետազոտությունների համաձայն՝ արդեն 2050 թվականին շվեյցարական սառցադաշտերի առնվազն կեսը կարող է անհետանալ: