Օրերս լրահոսում հանդիպած ուշագրավ լուրերից էր, որ ՀՀ վարչապետ Նիկոլ Փաշինյանն ընդունել է «Բոինգ» միջազգային կորպորացիայի փոխնախագահ Ռիչարդ Մուեհլենբեկին, կորպորացիայի մարքեթինգի գծով տնօրեն Ալեմ Վալիին եւ ֆինանսական հաճախորդների գծով ղեկավար Մհեր Պապյանին։
Ըստ պաշտոնական հաղորդագրության՝ զրուցակիցները քննարկել են ավիահաղորդակցության ոլորտում համագործակցությանը վերաբերող հարցեր։ Փաշինյանը նշել է, որ ՀՀ կառավարությունը շահագրգռված է «Բոինգ» աշխարհահռչակ կորպորացիայի հետ փոխշահավետ համագործակցությամբ։
Իր հերթին էլ «Բոինգ»-ի ղեկավար կազմի ներկայացուցիչներն անդրադարձել են մեր երկրում հնարավոր գործունեության եւ համագործակցության ուղղություններին, այդ թվում՝ ավիացիոն շուկայի հնարավորություններին։
ՀՀ քաղավիացիայի վարչության նախկին պետ Շահեն Պետրոսյանը «Առաջին լրատվական»-ի հետ զրույցում ուշադրություն է հրավիրում այն փաստի վրա, որ Քաղաքացիական ավիացիայի կոմիտեի ղեկավարի եւ կառավարության միջեւ կա որոշակի հակասություն․ առաջինը պնդում է, որ մեզ պետք չէ ազգային ավիափոխադրող, վարչապետն ասում է, որ մենք պարտավոր ենք ստեղծել ազգային ավիափոխադրող։
Ինչ վերաբերում է «Բոինգ»-ի հետ հանդիպմանը, ապա Շահեն Պետրոսյանը նշեց, որ մեր շուկան դատարկ է «Բոինգ»-ի համար, մենք չունենք սեփական ավիաընկերություն։
«Լավ է, որ «Բոինգ»-ի հետ հանդիպել են, թե ինչ պայմանավորվածություններ են ձեռք բերել՝ տեղյակ չեմ։ Ժամանակին մենք աշխատում էինք «Բոինգ»-ի հետ, դա 90-ական թվականներին էր։ Մենք եկել էինք համաձայնության, որ «Հայկական ավիաուղիներ»-ի համար երեք «Բոինգ» վերցնենք վեց միլիոն դոլարով՝ 12 տարով անտոկոս վարկով։ Մենք այդպիսի պայմանավորվածություն ունեինք 1996թ, բայց հետո գիտեք, թե ինչ եղավ»,- հիշում է Շահեն Պետրոսյանը։
Շահեն Պետրոսյանը նկատում է, որ Հայաստան այլ ավիափոխադրող չի գա, տարիուկես միայն խոստումներ են հնչում։ Իսկ Հայաստան այլ ավիափոխադրող չի գա, քանի որ ՀՀ-ն ԵԱՏՄ անդամ է։ Նա տեղեկացել է նաև, որ ռուսական երկաթգիծը որոշել է դադարեցնել սպասարկել հայկական երկաթուղին։
«Եթե ռուսական ավիացիան էլ հրաժարվի թռչել մեզ մոտ, ապա պետք է մենք մտածենք սեփական ավիաընկերություն ունենալու մասին,- նշեց մեր զրուցակիցը։
Շահեն Պետրոսյանը քաղավիացիայի ոլորտում բարեփոխումներ իրականացնելու համար մեկ ամիս առաջ իր առաջարկություններն է ներկայացրել կառավարություն, սակայն մինչ օրս պատասխան չի ստացել։
«Փոքրիկ էքսկուրս եմ գրել «Հայկական ավիաուղիներ»-ի մասին, առաջարկել եմ, թե ինչ մեխանիզմներով պետք է իրականացնել փոփոխություններ»,- ասաց Շահեն Պետրոսյանը։