ՍԴ անդամ Արևիկ Պետրոսյանը պարզունակ մանիպուլյացիա է անում. փաստաբան

Երեկ արդեն հայտնի դարձավ, որ ԱԺ իշխանական «Իմ քայլը» խմբակցության նախաձեռնությամբ շրջանառության մեջ է դրվել Սահմանադրական դատարանի նախագահ Հրայր Թովմասյանի լիազորությունները դադարեցնելու հարցով ՍԴ դիմելու նախագիծը։ 94 էջանոց փաստաթղթում հայաստանյան օրենսդրության և միջազգային դատարանների նախադեպերին հղում անելով՝ ներկայացվել են ՍԴ նախագահի լիազորությունները դադարեցնելու հիմքերը։ Որոշման նախագիծն ԱԺ-ում պետք է ընդունվի փակ քվեարկությամբ, առնվազն 80 պատգամավորի քվե է անհրաժեշտ։ Եթե ԱԺ-ն ընդունի այդ նախագիծը, ապա այն ուղարկվելու է բարձր դատարան։

Փաստաթղթի հիմնավորվածության մասին մի քանի հարց ուղղեցինք փաստաբան Կարապետ Բադալյանին։

-Պարոն Բադալյան, նախագիծն, ըստ Ձեզ, որքանո՞վ է հիմնավորված և անխոցելի, որպեսզի հակընդդեմ կողմը չկարողանա ներկայացնել առարկություններ։

-Փաստաթուղթը հիմնավոր է, կան բազմաթիվ փաստեր՝ իրենց ապացույցներով։ Բնականաբար, մյուս կողմն էլ կունենա իր փաստարկները, իր բացատրությունները։ Բոլոր փաստերն էլ վկայում են, որ կան բավարար հիմքեր՝ սկսելու ՍԴ նախագահի լիազորությունները դադարեցնելու գործընթաց։

Օրենքով նախատեսված հստակ գործընթաց է։ Որ ապացույցն էլ նայեք՝ կտեսնեք, որ հիմնավոր է։

-Փաստ է, որ ՍԴ նախագահ Հրայր Թովմասյանը խոչընդոտել է Ռոբերտ Քոչարյանի գործի անաչառ քննությանը։

-Տեսեք, խոչընդոտելը ո՞րն է, այնտեղ հստակ նշված է եղել, թե ինքն ինչու չի կարող մասնակցել։ Կան անհնարինության հիմնավորումները։ Հիմա դրան հակառակ որևէ փաստարկ չի ներկայացվել, չի լսվել։ Միգուցե Հրայր Թովմասյանը մի բան գիտի, թող հայտնի, թող բացատրի, ասի, որ այդ ամենը հիմնավոր չէ։ Իրենք կոնկրետ պետք է բովանդակային խոսք ասեին, իրենք նույնիսկ բովանդակային չէին առարկել, այլ ասել են՝ մենք գործընթացը չպետք է լսեինք, չենք լսել։ Ոչ թե ճիշտ է, սխալ է, շատ է, քիչ է, այլ անտեսել են այդ հարցը։ Դա իր հերթին կոպիտ խախտում է։ ՍԴ երեք անդամները՝ Հրայր Թովմասյանը, Արևիկ Պետրոսյանը, Հրանտ Նազարյանը, որոնց գործի քննությանը մասնակցության անհնարինության համար բացարկ է ներկայացվել, անտեսել են այդ հարցը։

-Եթե այդ նախագիծն ընդունվի ԱԺ-ում, ապա ի՞նչ զարգացումներ են սպասվում, ՍԴ անդամները կներկայացնե՞ն հրաժարական։

-Այս պահին հնարավոր չէ ասել, թե ինչ զարգացումներ կլինեն։ Մի քանի մարմինների որոշման հարց է։ Հավանական տարբերակներից է, որ Հրայր Թովմասյանի լիազորությունները կդադարեցվեն։

-Իսկ ՍԴ մյուս անդամնե՞րը։

-Մյուսների մասին չեմ կարող ասել, քանի որ ԱԺ-ն գործընթացը ՍԴ նախագահի նկատմամբ է սկսել։

-Այդ նախագիծը ՍԴ-ում ստեղծված ճգնաժամը հանգուցալուծելու օպտիմալ տարբերա՞կ է։

-Ուղղակի տարբերակներից մեկն է։ Մեկ ուրիշ տարբերակ էլ Դատական օրենսգրքում փոփոխություններն են՝ վաղ կենսաթոշակի հետ կապված։ Դա էլ մոտ ապագայում կլինի, կտեսնենք։ Այսինքն՝ այդ բոլոր քայլերն արվում են ճգնաժամը հանգուցալուծելու համար։

-Եթե ուսումնասիրում ենք այլ երկրների փորձը, ապա հետհեղափոխական իրավիճակներում ի՞նչ լուծում է եղել։

-Օրինակ՝ մի քանի ամիս առաջ Մոլդովայի Սահմանադրական դատարանը՝ ամբողջ կազմով, հրաժարական տվեց, հեռացավ։ Ամբողջ կազմով հեռացան, որովհետև հասկացան, որ իրենք չեն համապատասխանում ժողովրդավարության այն պահանջներին, որոնք հաստատվել են այդ երկրում։ Եվ դատարանի կազմն ամբողջությամբ փոխվեց։

-Իսկ ահա մեր ՍԴ անդամ Արևիկ Պետրոսյանն ասել էր․ «Ես ինչո՞ւ պետք է հրաժարական տամ, որովհետև այդպես է ցանկանում Վահե Գրիգորյա՞նը»։

-Վահե Գրիգորյանը այդպիսի բան չի ասել, Արևիկ Պետրոսյանը պարզունակ մանիպուլյացիա է անում։ Դուք կարդացե՞լ եք Վահե Գրիգորյանի նամակը, որով սահմանադրական մարմինների մասնակցության լուծման տարբերակ է առաջարկում։