Իրանը մինչև տարեվերջ ՄԱԿ-ին կներկայացնի Պարսից ծոցի, Հորմուզի նեղուցի և Օմանի ծոցի անվտանգության ապահովման համագործակցության ծրագիր: Այս մասին հայտարարել է Իրանի նախագահ Հասան Ռոհանին Թեհրանում անցկացվող զորահանդեսի ժամանակ, հայտնում է Reuters-ը՝ կիրակի, սեպտեմբերի 22-ին:
«Այս տարի մենք ՄԱԿ-ին կապացուցենք, որ Իրանը, համագործակցելով տարածաշրջանի երկրների հետ, կարող է անվտանգություն ստեղծել Պարսից և Օման ծոցերում», – ասաց նա:
Իրանի նախագահը նաև նշել է, որ Պարսից ծոցի տարածաշրջանում օտարերկրյա զորքերի առկայությունը ուժեղացնում է «անապահովությունը» տարածաշրջանում այն բանից հետո, երբ ԱՄՆ-ը հայտարարեց Մերձավոր Արևելքում լրացուցիչ զորքեր ուղարկելու մասին որոշումը:
Նախօրեին ԱՄՆ-ի գանձապետարանը հայտարարեց Իրանի Կենտրոնական բանկի, Ազգային զարգացման հիմնադրամի և Etemad Tejarate Pars Co.-ի դեմ պատժամիջոցների կիրառման մասին:
ԱՄՆ նախագահ Դոնալդ Թրամփը նոր միջոցառումներն անվանել է «առավել նշանակալից բոլորից, որոնք երբևէ ներդրվել են երկրի դեմ»:
Իրանն էլ իր հերթին նշել է, որ ԱՄՆ նոր պատժամիջոցները ցույց են տալիս «ամերիկյան հուսահատությունը»: