Վճռաբեկ դատարանը՝ նախագահությամբ դատավոր Համլետ Ասատրյանի, հրապարակել է որոշում, որով բեկանվել է նախկին զինդատախազ Գագիկ Ջհանգիրյանի վերաբերյալ 2009 թվականին կայացված դատավճիռը՝ կապված 2008-ի իրադարձությունների հետ, և արդարացնելով նրան։
Դատախազությունը համամիտ է, որ Գագիկ Ջհանգիրյանի հիմնարար իրավունքները խախտվել են 2008 թվականի իրադարձությունների առթիվ նրա վերաբերյալ քննվող քրեական գործի շրջանակներում: Վճռաբեկ դատարանում Ջհանգիրյանի բողոքի առթիվ քննվող քրեական գործի շրջանակներում դատախազ Պետրոս Պետրոսյանը նշեց, որ Ջհանգիրյանի գործով քննության ընթացքում թույլ են տրվել դատավարական իրավունքի այնպիսի խախտումներ, որոնց արդյունքում ընդունված դատական ակտը խաթարում է արդարադատության բուն էությունը: Դատախազը դիրքորոշում հայտնեց, որ Ջհանգիրյանի վերաբերյալ մեղադրական դատավճիռը պետք է բեկանել ու գործն ուղարկել առաջին ատյանի դատարան՝ նոր քննության, սակայն Վճռաբեկ դատարանը, ինչպես վերևում նշեցինք, որոշեց Ջհանգիրյանին արդարացնել: Նշենք, որ Գագիկ Ջհանգիրյանը 3 տարի ժամկետով ազատազրկման է դատապարտվել իշխանության ներկայացուցչի նկատմամբ բռնություն գործադրելու հոդվածով:
Փաստաբան Նորայր Նորիկյանն «Առաջին լրատվական»-ի հետ զրույցում ասաց՝ հնարավոր չէ չողջունել արդարադատության վերականգնման փաստը. «Գործի բովանդակային մասին ծանոթ չեմ, բայց ողջունելի է, որ 2008 թվականի Մարտի 1-ի իրադարձությունների հետևանքով ապօրինաբար քրեական հետապնդման ենթարկված և կալանավորված, ուղղակիորեն հետապնդումների ենթարկված անձանց խախտված իրավունքները վերականգնվում են»։
Նորիկյանը նշեց. «Այստեղ ազգանունները կարևոր չեն, կարևոր է օրինականության վերականգնման հանգամանքն ինքնին։ Ես ողջունում եմ և կարծում եմ, որ այս պրոցեսը պետք է հետևողական գնա մինչև վերջ։ Բոլոր այն մարդիկ, ովքեր տարիների ընթացքում ապօրինաբար հետապնդվել են, դատապարտվել են մեկ կամ մի քանի անձանց քաղաքական քմահաճույքների պատճառով, պետք է արդարացվեն»։
Իրավապաշտպան Արթուր Սաքունցն «Առաջին լրատվական»-ի հետ զրույցում անդրադառնալով արդարացման դատավճռին՝ որոշակի մտահոգություններ հայտնեց։ Մեր զրուցակիցը մասնավորապես ասաց՝ հասկանալի չէ, թե ինչ սկզբունքով են ընտրվում ու քննվում գործերը։ Ըստ իրավապաշտպանի՝ պետք է դիտարկել ոչ միայն Մարտի 1-ի, այլև 2008-ից առաջ և հետո կայացված բազմաթիվ այլ ապօրինի վճիռները, որոնք եղել են ակնհայտորեն քաղաքական հետապնդումներ. «Սա իր էությամբ տեղավորվում է անցումային արդարադատության շրջանակների մեջ, բայց սկզբունքները, թե ինչի հիման վրա են կոնկրետ այդ գործերը վերցվում, ինձ հայտնի չեն»։
Ըստ Սաքունցի՝ նմանատիպ ապօրինի որոշումներ կայացվել են բազմաթիվ մարդկանց նկատմամբ՝ թե՛ Մարտի 1-ից առաջ և թե՛ նաև դրանից հետո. «Պետք է մշակվի մոտեցում, որպեսզի հատային չլինի, ընտրողական մոտեցման տպավորություն չստեղծվի։ Սա անցումային արդարադատության շրջանակներում է, այդ տրամաբանության մեջ, բայց անցումային արդարադատության վերաբերյալ փաստաթուղթը դեռևս ընդունված չէ։ Իհարկե, լավ կլինի, որ այդ գործերը վերանայվեն, բայց կրկնում եմ՝ ոչ միայն Մարտի 1-ը»։
Մեր այն դիտարկմանը, որ այժմ վերաբացվել է հենց Մարտի 1-ի գործը, Սաքունցը պատասխանեց. «Դա կապ չունի։ Անկախ նրանից, որ Մարտի 1-ի գործով նախկին պաշտոնատար անձանց նկատմամբ քրեական գործ է հարուցվել, ես կայացված այդ քաղաքական որոշումները չէի կապի քրեական գործի հետ։ Շանթ Հարությունյանի և իր ընկերների նկատմամբ ևս պետք է արդարացման դատավճիռ կայացվի, 2003-2004 թթ. բազմաթիվ ապօրինի դատավճիռներ են եղել, նաև դրանից ավելի վաղ՝ 1996 թվականին։ Բոլորը պետք է վերանայվի»։
