«Որոշ կոռուպցիոներներ մտածել են, թե Ազգային անվտանգության ծառայությունում խառն են, և իրենք կարող են այս ընթացքում իրենց մութ գործերը կարգավորել: Նոր Հայաստանում ԱԱԾ-ն անձ չէ, այն համակարգ է…» վարչապետ Փաշինյանի այս գրառման առնչությամբ քաղաքագետ Արմեն Հովհաննիսյանը «Առաջին լրատվական»-ի հետ զրույցում ասաց. «Այս մի քանի օրերին եղան նաև հավելյալ ձերբակալություններ, քրեական գործերի հարուցումներ, և պարոն Փաշինյանն ուզում է ցույց տալ, որ ինստիտուտը կա, և այն շարունակում է գործել ու գործում է նույնիսկ ավելի խիստ, քան պարոն Վանեցյանի հրաժարականից առաջ: Դա իր կառավարումը հանրությանը ավելի շահեկանորեն ներկայացնելու փորձ է, ինչը քաղաքական գործչի համար նորմալ երևույթ է»:
«Եթե մենք ասենք՝ Նիկոլ Փաշինյանի անձով չեն պայմանավորված փոփոխությունները, այդ դեպքում կասենք՝ կայացավ նոր տիպի պետություն»,- հավելեց քաղաքագետ Արա Պապյանը:
Անդրադառնալով ԲՀԿ առաջնորդ Գագիկ Ծառուկյանի մտերիմ ընկերոջը՝ «Մուլտի գրուպ»-ի գործադիր տնօրեն Սեդրակ Առուստամյանին, բերման ենթարկելու փաստին, Արա Պապյանն ասաց. «Սա վկայում է այն մասին, որ հեղափոխությունը շարունակվում է՝ գոնե համաժողովրդական ճնշման տակ: Այստեղ ամենակարևոր հանգամանքը այն չէ, թե ում են բռնել, այլ այն, թե որքանով է արդարացի լինելու այդ ամբողջը»:
Նրա խոսքով՝ նախորդ մի քանի ամիսներին եղած վիճակը կարելի է բնութագրել որպես քաղաքական օլոմբա. «Այսինքն՝ ո՛չ այս կողմ էր, ո՛չ այն կողմ, և պարզ է, որ նման վիճակը երկար շարունակվել չէր կարող՝ կա՛մ պիտի հետ շրջվեր նախահեղափոխական իրավիճակը, կա՛մ պիտի առաջ գնա: Այս կիսատ վիճակը ամենավատն է: Ես կարծում եմ, որ նման քայլերը արդարացված են, և հեղափոխությունը պետք է լինի հեղափոխական: Չի կարող հեղափոխությունն առաջնորդվել կամ խարսխվել նախահեղափոխական, ես կասեի՝ հակահեղափոխական օրենսդրության և ստեղծված իրավիճակի վրա»:
Արմեն Հովհաննիսյանն էլ նշեց, որ Գագիկ Ծառուկյանը միակ խոշոր ձեռներեցն է, որը չի իրականացրել Նիկոլ Փաշինյանի թիմի նախնական պայմանը, այն է՝ դուրս մնալ քաղաքական գործընթացներից և Ազգային ժողովից:
Հարցազրույցն ամբողջությամբ՝ տեսանյութում: