Թուրքիայի ներքին գործերի նախարարությունը Պոլսո հայոց պատրիարություն դեռ չի ուղարկել կանոնադրություն, թե ինչպես պետք է կազմակերպվեն պատրիարքի ընտրությունները։ Թեև ավելի վաղ պատրիարքի ընտրությունները համակարգող մարմինը հանդիպել է Թուրքիայի ներքին գործերի նախարար Սուլեյման Սոյլուի հետ, որը տեղեկացրել էր, որ որևէ խնդիր պատրիարքի ընտրությունների հետ կապված չի առաջանալու և որ մինչև տարեվերջ այդ ընտրությունները տեղի կունենան․«Ամեն վայրկյան սպանում ենք պատասխանի»,- «Առաջին լրատվական»-ի հետ զրույցում ասաց Ստամբուլի «Ակոս» թերթի հայկական բաժնի խմբագիր Բագրատ Էստուկյանը։
Ամենայն հավանականությամբ՝ պատրիարքի ընտրություններին կառաջադրվի երեք թեկնածու՝ Գուգարաց թեմի առաջնորդ Սեպուհ արքեպիսկոպոս Չուլջյանը, կրոնական ժողովի ատենապետ Արամ Աթեշյանը, պատրիարքական տեղապահ Սահակ Մաշալյանը։
Էստուկյանը նշեց, որ թեև պաշտոնապես դեռ չեն հաստատված թեկնածուները, սպասում են կանոնադրությանը, սակայն այս երեքը հաստատ կլինեն թեկնածուներ։ Նա նշեց, որ 12 եպիսկոպոս կա, որ կարող է առաջադրվել, սակայն դեռ նամակ չի ուղարկվել նրանց՝ ճշտելու՝ առաջադրվում են Պոլսո հայոց պատրիարքի ընտրություններին, թե ոչ։
Էստուկյանի խոսքով՝ այս երեք թեկնածուներից հնարավոր է հաղթի Գուգարաց թեմի առաջնորդ Սեպուհ արքեպիսկոպոս Չուլջյանը։ Թեև Սեպուհ սրբազանը դեռ Թուրքիայում չէ, սակայն համայնքի տրամադրությունները հուշում են նրա հնարավոր հաղթանակի մասին։
Ըստ Էստուկյանի՝ Սահակ Մաշալյանն ընդհանրապես ընտրվելու շանս չունի, բայց այս դեպքում էլ Արամ Աթեշյանն ավելի նախընտրելի է, քան կասկածելի Սահակ Մաշալյանը։