Լուրեր
Փաշինյանը ուժեղ քաղաքական հոտառություն ունի. ժողովրդին պետք է ազատել այս խաղերից
  • 17:45
  • 2019-09-21
  • Դիտումներ՝ *

«Վերջին օրերի գործողություններով իշխանությունն ուժեղանում է: Կուլմինացիան տեղի ունեցավ: Վարչապետի քաղաքական հոտառությունը շատ ուժեղ է, իրադրության մեջ կողմնորոշվելու կարողություն ունի: Ոչ մեկը գլխի չի ընկնում որտեղ է վտանգը, նա արագ նկատում է և քայլ անում: Նա անկանխատեսելի է, մեր փոքր պետության համար անկանխատեսելիությունը շատ մեծ առավելություն է… Մենք պետություն ենք ստեղծում»,- «Առաջին լրատվական»-ի հետ զրույցում այս մասին ասաց քաղաքագետ Լևոն Շիրինյանը՝ անդրադառնալով Ա. Վանեցյանի և Վ. Օսիպյանի պաշտոնանկություններին:

Քաղաքագետի կարծիքով՝ ուժային կառույցների ղեկավարների հրաժարականը անսպասելի չէր: «Պրոցես է ընթանում, կուլմինացիա պետք է լիներ, եղավ: Իշխանությունն այս քայլով վերադառնում է հեղափոխական օրակարգին»:

«Նախկինները ձև են թափում, իբրև թե խանդավառության մեջ են, բայց նրանք ողբերգություն են ապրում, քանի որ կազմակերպված հակագրոհը տապալվեց. կշարունակվի դատական գործընթացը, պաշտոնաթողությունները. հեղափոխության երկրորդ փուլն է սկսվում: Ժողովուրդն իշխանության աղբյուրն է, նա 2018թ. մայիսի 2-ին նոր իշխանությանը պատվիրակել է վերափոխել Հայաստանը»,- նշեց Լ. Շիրինյանը:

Քաղաքագետի խոսքով՝ ժողովուրդը նեղացած է վարչապետից, առայժմ դեմ չէ. «Մի օր էլ կարող է դեմ լինել, լեգիտիմությունն օդից չի ընկնում և աստվածային պարգև չէ: Պետք է լիբերալիզմը չափավորել, պետության ֆունկցիան պետք է վերականգնվի…»:

Անդրադառնալով Վանեցյանի հայտարարության «կանգ առ» եզրույթին՝ Լ. Շիրինյանն ընդգծեց. «Քաղաքականությունը նաև թատրոն է, մեկի համար ողբերգություն է, մյուսի համար՝ կոմեդիա: Հիմա տրագիկոմեդիա է, բայց Հայաստանի համար սա դրամա, որովհետև պետականաշինություն է ընթանում»:

Մանրամասն՝ տեսանյութում:

  • Դիտումներ՝ *