Առնվազն երկու մարդ է ձերբակալվել գաղտնի «51 գոտու» մուտքի մոտ, որտեղ հայտնի առեղծվածի համաձայն կարող են այլմոլորակայիններ գտնվել, հաղորդում է Associated Press գործակալությունը։
Հուլիսին մոտ երկու միլիոն մարդ էր ֆեյսբուքում գրանցվել ամերիկյան «51 գոտի» ռազմաբազան «գրոհելու» hամար, որպեսզի ապացուցեին լեգենդը, ըստ որի այդտեղ այլմոլորակայինների՝ Երկիր այցելության ապացույցներ են պահվում կամ միգուցե՝ հենց այլմոլորակայիններ։ Միջոցառումը նախատեսված էր սեպտեմբերի 20-ին, սակայն օգոստոսի սկզբին սոցցանցը ջնջեց այդ էջը։
Չնայած դրան, ուրբաթ օրը Նևադա նահանգի «51 գոտի» ռազմաբազայի մոտ 75 մարդ էր հավաքվել։ Ոմանք եկել էին այլմոլորակայինների կոստյումներով, մի տղամարդ փայլաթիթեղից գլխարկ էր դրել և ԿԺԴՀ դրոշն էր իր հետ վերցրել։
Ամերիկյան իշխանությունները «51 գոտի» ռազմաբազայի գոյությունն ընդունել են միայն 2013 թվականին։ Հիմա այն լավ պահպանվող օբյեկտներից մեկն է։
