Ֆրանսիայի նախագահ Նիկոլա Սարկոզին դեկտեմբերին ժամանելու է Թուրքիայի մայրաքաղաք Անկարա: Այս մասին հաղորդել է թուրքական «TRT» հեռուստաընկերությունը:
Հիշեցնենք` Սարկոզիի վերջին հայտարարությունը Լիսաբոնում կայացած ՆԱՏՕ-ի գագաթնաժողովի ժամանակ, թե Իրանն ու Մերձավոր Արևելքը պետք է անպատճառ որակվեն որպես հավանական ռիսկային գոտի հակահրթիռային նոր համակարգերի տեղակայման բաշխումն իրականացնելիս, բացասական արձագանք էր ստացել Թուրքիայի նախագահ Աբդուլլահ Գյուլի մոտ: Նույն գագաթնաժողովի ժամանակ Գյուլի և Սարկոզիի միջև մեկ այլ բանավեճ էր տեղի ունեցել կիպրական հարցի շուրջ:
Հիշեցնենք նաև, որ Ֆրանսիան Գերմանիայի հետ Թուրքիայի ԵՄ անդամագրման ամենագլխավոր ընդդիմադիրներից է: Սարկոզին իր ելույթներում բազմիցս է ընդգծել, թե Թուրքիան Եվրոպա չէ, հետևաբար չի կարող ընգրկվել եվրոպական ընտանիքում` փոխարենը առաջարկելով համագործակցության մեկ այլ ձևաչափ, ինչն անընդունելի է Թուրքիայի համար:
