«Առաջին լրատվական»-ի զրուցակիցն է ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը:
– Դուք Հայաստանում չէիք, վստահ եմ՝ դրսից հետևում էիք այստեղ տեղի ունեցող լուրջ իրադարձություններին, հատկապես պաշտոնանկություններին ի՞նչ աչքով էիք նայում:
– Պաշտոնանկությունները վերաբերում էին ուժային բլոկին, և բնականաբար, անհանգստություններ ունեին բոլորը: Անկեղծ ասած, պաշտոնանկություններ չէի սպասում, պարոն Վանեցյանի ներկայացրած դիմումի մասին լսել էի, բայց մտածում էի, որ րոպեական պոռթկումներ են, կանցնեն, չէի մտածում, որ խորքային ինչ-որ բան կպարունակի, մինչև այն պահը, երբ Վանեցանի հայտարարության տեքստը կարդացի: Դա քաղաքական հայտարարություն էր, և չհասկացա, թե ինչ լուծումներ էր առաջարկում նա՝ այդ հայտարարությունը տարածելով:
– Ըստ Ձեզ՝ ի՞նչն է մղել այդ քայլին:
– Պետք է խորքային ուսումնասիրություն անել՝ հասկանալու համար մղումներ կայի՞ն, թե՞ չկային, դա իրոք րոպեական պոռթկո՞ւմ էր, թե՞ ոչ, դրա տակ կա՞ր դավադրություն, թե՞ չկար: Ամեն դեպքում քաղաքական հայտարարություն է անում ԱԱԾ պետը, ով հեղափոխության արդյունքում էր ԱԱԾ ղեկավար նշանակվել: Գիտենք, որ Ն. Փաշինյանը կոռուպցիայի դեմ անողոք պայքարի սլաք ուղղեց, և վարչապետը նախանշեց, որ դա իրականացնող թիվ մեկ կառույցը ԱԱԾ-ն է:
– Այսինքն՝ վա՞տ էր իրականացնում:
– Չէ, կարծում եմ՝ իրականացնում էր, բայց լավ ու վատի խնդիր չէր: Ժողովուրդը վատ սպասելիքներ ուներ այդ կառույցից, հեղափոխությունը դրական սպասելիքներ առաջացրեց այդ կառույցի նկատմամբ: Եվ այդ դրական սպասումներն իրականացնում էր մարդ, որը մինչ այդ հայտնի չէր, նա ԱԱԾ պետ աշխատեց մեկ տարուց մի քիչ ավելի և դաձավ հեղափոխական թիմի նախանշված պայքարի առաջամարտիկը, և հանկարծ հայտնվում է այդ քաղաքական հայտարարությունը, որի բացատրությունը պարզ չէ:
– Իսկ միգուցե ինչ-որ ժամանակ խորքային բաներ են տեղի ունեցել:
– Հատուկ ծառայությունների պետերը գալիս են աննկատ և գնում են աննկատ. խաղի ճիշտ կանոններն այդպիսին են: Երբ որ անորոշությամբ շղարշված հայտարարություններ ես անում, երկիրը դնում ես անորոշության մեջ, սկսվում է քաղաքական շրջանակի աշխատանքը, սկսվում են շահարկումներ: Ի վերջո, պատահական մարդ չէ այդ հայտարարությունն անողը, Վանեցյանի անձը թողնենք մի կողմ, հայտարարություն է անում ԱԱԾ պետը, որը փակ կառույց է, և փակ կառույցի հայտարարությունը սկսում է շահարկվել, որ ուրեմն այնտեղ ինչ-որ բան այնպես չէր, և եթե ասվում է՝ կա՛նգ առեք, ուրեմն կանգ առնելու ինչ-որ թեմաներ կան, բայց պարոն Վանեցյանը հստակ պետք է նշեր՝ որ հարցում կանգ առնել՝ կոռուպցիայի դեմ պայքարո՞ւմ, հանցավորության դեմ պայքարո՞ւմ, որովհետև ինքը միայնակ չէ, այդ կառույցը համակարգ է, և նրա կողքին կա նաև ոստիկանությունը, որը նույնպես իր աշխատանքները կատարում է: Եվ այս ամենի մեջ, ըստ էության, սկսեցին թուլանալ մեր անվտանգության երկու հիմնական բաղադրիչները, պետք է կադրային նշանակումները և հեռացումները լինեին շատ տրամաբանված, երբ որ դա իրականացվում է քաղաքական ենթատեքստերով, դա մեր երկիրը կարող է թուլացնել, բայց փառք Աստծո, թուլացման հնարավորությունները շատ մեծ չեն. մեկ-երկու քաղաքական հայտարարությունները կամ պաշտոնանկությունները չեն, որ կթուլացնեն քաղաքական իշխանության նպատակներն ու ուժը:
– Դուք ինչպե՞ս եք հասկանում «սպայի պատիվ, արժանապատվություն» ասվածի ենթատեքստը, դա ի՞նչ ակնարկ է:
– Սպայի պատիվն այն հիմնական գաղափարն է, որը երկիր է պահում, սպայի պատիվը պետք է պահեն բոլոր ուժային կառույցները, ուսադիրների տակ գտնվող մարդը՝ սպան, այդ պատվի համար նույնիսկ պատրաստ պետք է լինի ինքնասպանություն կատարել, այսինքն՝ նույնիսկ իր կյանքի գնով քավել իր մեղքը:
– Այդ արտահայտությունը տեղ է գտել քաղաքական տեքստում:
– Ուզում եմ հասկանալ՝ որտե՞ղ է ոտնահարվել սպայի պատիվը, ո՞ր հարցում, լավ կլիներ, որ տեքստից զատ, լիներ բացատրություն:
– Ես մտածեցի, որ դուք կօգնեք հասկանալ դա:
– Ես կարող եմ օգնել, բայց ոչ հիմա: Ես կուզեմ, որ պարոն Վանեցյանն առաջին հերթին օգնի իրեն, որպեսզի իրեն հասկանան, հետո նոր, եթե դրա կարիքը լինի, բնականաբար, նաև ես և մեր հանձնաժողովը ի վիճակի կլինենք հասկանալու, թե խնդիրներ եթե եղել են, ապա որտեղ են եղել՝ հենց նույն կառույցի ներսո՞ւմ, թե՞ քաղաքական կառավարման համակարգում:
– Վանեցյանի քաղաքական հավակնությունն արագ աշխուժացրեց քաղաքական ուժերին, որոնք կցանկանային նրան իրենց կազմում տեսնել, թեև Վանեցյանը հասցրել է հերքել՝ ասելով, որ այդպիսի հավակնություն չունի:
– Վանեցյանը հրաժարական է տվել, բայց չի ասել, որ պետք է ինքնասպան լինի, ձեր նախանշած ուժերի հետ միանալը նշանակում է ոչ թե ֆիզիկական, այլ բարոյական ինքնասպանություն, իսկ Վանեցյանն այդպիսի քայլի գնացող չէ, նա շատ լավ գիտի այդ ուժերի արժեքը, տեղն ու նպատակները: Հիմա թե ինչն էր պատճառը իր տվյալ հայտարարության, դա կա՛մ կիմանանք իրենից, կա՛մ քաղաքական վերլուծաբանները կպարզաբանեն, թե ինչ ենթատեքստեր կան տողատակերում:
– Քաղաքական վերլուծաբաններն այս օրերին այդ թեմայով ինչ վերլուծություն ասես, որ չարեցին:
– Փաստը մնում է փաստ, որ գեներալ Վանեցյանն այդ քայլը չպետք է աներ, նա պետք է ինչպես որ աննկատ նշանակվել էր, այդպես էլ աննկատ հեռանար, եթե ուներ անհամաձայնություն՝ կապված քաղաքական զարգացումների հետ:
– Որոշ վերլուծաբանների կարծիքով՝ իշխանությունը հեղափոխական օրակարգից շեղվել էր, հիմա վերադառնում է այդ օրակարգին՝ նկատելով ռիսկերը:
– ԱԱԾ պետն ապրում է նույն տարածքում, որտեղ քաղաքական թիվ մեկ պաշտոնյան՝ կառավարական ամառանոցում, և ամենամեծ հնարավորություններն ունի Ն. Փաշինյանի հետ շփվելու, և չեմ կարծում, որ չհասկացվածություն լինի, կարծում եմ, որ, այնուամենայնիվ, այստեղ քաղաքական ենթատեքստ գոյություն ունի:
Հարցազրույցն ամբողջությամբ՝ տեսանյութում:
