ՌԴ տրանսպորտի նախարարության մամուլի ծառայություը տեղեկացրել է, որ Ռուսաստանը տարբերակներ է մշակում Հայաստանի երկաթուղու կառավարման մասին պայմանագիրը վաղաժամ խզելու վերաբերյալ։
Ավելի վաղ այդ մասին հաղորդել էր RTVI հեռուստաընկերությունը` հղում անելով «Ռուսաստանի և Հայաստանի բանակցությունների ընթացքին քաջատեղյակ աղբյուրին»։ Նման որոշումը պայմանավորում են Հայաստանում գործող դուստր ձեռնարկության դեմ հարուցված քրեական գործով։
RTVI –ին տված հարցազրույցում Ռուսաստանի տրանսպորտի փոխնախարար Վլադիմիր Տոկարևն ասել էր` Հայաստանը մի իրավիճակ է ստեղծել, որի դեպքում ՀԿԵ–ն չի կարող բնականոն աշխատել. «Անտեսվում են մեր այն փաստարկները, որ ավելի վաղ իրականացված ստուգումներից հետո խախտումներ չեն բացահայտվել, և կոնցեսիայի պայմանները կատարվում են», – ասել է Տոկարևը։
«Հարավկովկասյան երկաթուղի» ՓԲԸ–ի մամուլի քարտուղար Ռուբեն Գրձելյանն, մեկնաբանելով այս լուրերը, ասել էր, որ ՀԿԵ–ն աշխատում է սովորական ռեժիմով, պայմանագիրը խզելու կամ այլ բանի համար որևէ նախադրյալ չկա։
Հիշեցնենք, որ «ՀԿԵ» ՓԲԸ-ն «Ռուսական երկաթուղիներ» ԲԲԸ-ի դուստր ընկերությունն է և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ՝ ևս 10 տարի երկարացման իրավունքով: